Onun sözlərinə görə, Qərb Rusiyanı "qırmızı xət"ə qədər təzyiq altında saxlayır və Moskvanın cavabından sonra öz əhalisini "əvvəllər sovet, indi isə Rusiya təhlükəsi" ilə qorxudur.

Putin bildirib ki, ABŞ dünya ictimaiyyətinə öz qaydalarını diktə edir və onları istədiyi kimi dəyişdirir.

"ABŞ üçün yeganə sabit qayda var: qaydasızlıq. Narazı dövlətlərə qarşı isə hibrid müharibələr aparılır və "çevrələmə" siyasəti həyata keçirilir", -  Putin bildirib. 

O qeyd edib ki, ABŞ-ın Avropadakı hərbi qüvvələrinin sayı 100 min nəfəri keçib. NATO ölkələri hərbi xərcləri artırır və Rusiya sərhədləri yaxınlığında zərbə qüvvələri yaradır. 

"ABŞ-ın təşəbbüsü ilə onilliklər ərzində formalaşmış təhlükəsizlik arxitekturasını pozan yeni hərbi-siyasi ittifaqlar yaradılır".

Müdafiə Nazirliyinin kollegiyasında çıxış edərkən Putin bəyan edib ki, ABŞ orta və kiçik mənzilli raketləri yerləşdirməyə başlasa, Rusiya bu sistemlərin yerləşdirilməsinə dair könüllü məhdudiyyətlərdən imtina edəcək. O, qeyri-strateji nüvə qüvvələrinin daima hazır vəziyyətdə saxlanılmasını tapşırıb. Putin əlavə edib ki, ölkənin strateji nüvə qüvvələrində müasir silahların payı artıq 95%-ə çatıb. Bu qüvvələri "sabitliyin, suverenliyin və Rusiyanın ərazi bütövlüyünün qorunmasının əsas alətlərindən biri" adlandırıb və yeni sistemlərin və komplekslərin yaradılması üzərində işləməyi tapşırıb.

"Bizə nüvə silahı ilə təhdid etməkdə ittiham etməsinlər",  - Putin əlavə edib.

"Oreşnik" raket komplekslərinin seriyalı istehsalına toxunan Putin bildirib ki, "bu komplekslərin Rusiyanın və müttəfiqlərimizin təhlükəsizliyini qorumaq üçün yaxın vaxtlarda seriyalı istehsalı təmin edilməlidir".