Münhen Təhlükəsizlik Konfransı İran nazirinə göndərilmiş dəvəti geri götürüb

Dünyanın aparıcı təhlükəsizlik forumlarından biri sayılan Münhen Təhlükəsizlik Konfransı bu il fevralda keçiriləcək toplantıya İranın xarici işlər naziri Abbas Əraqçiyə göndərilmiş dəvəti ləğv etdiyini açıqlayıb.Bu barədə “Reuters” xəbər verir.

Təşkilatçılar bəyanatlarında bir neçə həftə əvvəl İran hökumətinin ayrı-ayrı nümayəndələrinə dəvətnamələr göndərildiyini, lakin son siyasi hadisələr fonunda bu dəvətlərin qüvvədə saxlanmayacağını bildiriblər.

Konfrans bu il 13-15 fevral tarixlərində təhlükəsizlik ekspertləri və siyasətçilərin iştirakı ilə keçiriləcək. Təşkilatçılar iştirakçı siyahısını formalaşdırarkən beynəlxalq siyasi prosesləri nəzərə aldıqlarını vurğulayıblar.

Rəsmi Berlin Almaniya hökumətinin İran rəsmilərinin konfransa dəvət edilməsinə qarşı olduğunu bildirib. Almaniyanın Xarici İşlər Nazirliyi qeyd edib ki, İranda dini hakimiyyətə qarşı keçirilən etirazların zorakılıqla dağıdılması nəticəsində minlərlə insanın həlak olduğu barədə məlumatlar mövcuddur.