"2023-cü ildə Səngəçal terminalı vasitəsilə "Azəri-Çıraq-Günəşli” yataqlar blokundan neftin, eləcə də "Şahdəniz” yatağından hasil edilən kondensat və təbii qazın daşınması adi qaydada həyata keçirilib. Bu dövr ərzində 230 milyon bareldən çox neft hasil edilib. Terminaldan neft və kondensat, o cümlədən Bakı-Tbilisi-Ceyhan (BTC) boru kəməri ilə 229 milyon bareldən çox, Bakı-Supsa boru kəməri ilə isə təxminən 1 milyon barel neft ixrac edilib”, -  şirkət bildirib. 

Terminalın texniki emal sistemlərinin gündəlik gücü hazırda 1,2 milyon barel neft və kondensat və "Şahdəniz" yatağından təqribən 81 milyon kubmetr qaz təşkil edir. Terminalın qazın emalı və ixracı üzrə ümumi gücü (AÇG-dən səmt qazı daxil olmaqla) gündə təxminən 100 milyon kubmetrdir.

Terminaldan qaz əsasən Mərhələ-1 çərçivəsində Cənubi Qafqaz Boru Kəməri, Şahdəniz layihəsinin Mərhələ-2 çərçivəsində genişləndirilmiş Cənubi Qafqaz Boru Kəməri (CQBK) və terminalın qaz emalı qurğularını birləşdirən SOCAR qaz kəməri ilə ixrac edilir. q

"2023-cü ildə terminal vasitəsilə "Şahdəniz” yatağından sutkada orta hesabla 71 milyon kubmetr qaz ixrac edilib (artım 4,4%)”, - şirkətdən bildirilib.

Bakıdan 55 km cənubda yerləşən Səngəçal terminalı Azərbaycanın neft-qaz sənayesinin ən mühüm obyektlərindən biridir. Terminal təqribən 550 hektar ərazini əhatə edir ki, bu da onu dünyanın ən böyük neft və qaz terminallarından birinə çevirir.

Terminal BP-nin Xəzər hövzəsində istismar etdiyi bütün mövcud dəniz yataqlarından neft və qazı qəbul etmək, emal etmək, saxlamaq və ixrac etmək üçün layihələndirilib və genişləndirmə potensialına malikdir.

Terminala neft və qaz emalı zavodları, Bakı-Tbilisi-Ceyhan (BTC) boru kəmərinin birinci nasos stansiyası, SPC kompressor stansiyası və digər obyektlər daxildir.

Dəniz obyektlərindən səkkiz müxtəlif boru kəməri terminala daxil olur, səkkiz boru kəməri isə terminaldan çıxır. Onlar yüksək keyfiyyətli Azərbaycan neftini və qazını müxtəlif marşrutlarla dünya bazarlarına nəql edirlər. Bundan əlavə, terminal Qazaxıstan və Türkmənistandan üçüncü tərəf neftini qəbul edir.