Sosial şəbəkədə olan bütün görüntülər araşdırılacaq. Bunu Mərkəzi Seçki Komissiyasının bu gün keçirilən iclasında MSK sədri Məzahir Pənahov deyib.
Onun sözlərinə görə, milyonlarla insanın iştirak etdiyi tədbirdə hansısa pozuntunun baş verməsi təbiidir.
"MSK hər zaman eyni prinsiplə işləyib. Bizim haqqımızda nə deyilir, nə yazılır qəti bizim üçün əhəmiyyəti yoxdur. Bizə lazımdır ki, Azərbaycan vətəndaşları görsün ki, qəbul etdiyimiz qərarlar əsaslandırılmış qərarlardır. Hansısa məmtəqədə pozuntu halı ilə bağlı bizə müraciət daxil olmayıbsa, biz onunla bağlı qərar qəbul edə bilmərik. Biz işimizi yüksək səviyyədə görəcəyik. Hesab edirəm ki, Azərbaycan cəmiyyəti bizim işimizi qiymətləndirəcək. Sosial şəbəkədə olan bütün görüntülər araşdırılacaq. Bu qədər kamera qarşısında danışırıq ki, sabah heç kim deməsin MSK-da məsələləri gizli araşdırır”, - Pənahov bildirib.
Sentyabrın 1-də Azərbaycanda növbədənkənar parlament seçkiləri keçirilib. Seçkilərin gedişini 112 min 749 yerli müşahidəçi müşahidə edib. Onlardan 65 mindən çoxu siyasi partiyaların nümayəndələri olub.
Qeydə alınan beynəlxalq müşahidəçilərin sayı 598 nəfər olub ki, onlar 51 təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsi olub.
371 nəfər siyasi partiyaların üzvü olsa da bitərəf kimi namizədliyini irəli sürüb. Ümumilikdə 676 namizədin siyasi partiya mənsubiyyəti olub.
ATƏT seçkiləri beynəlxalq standartlara və qurumun tələblərinə uyğun keçirilmədiyini bildirib.
N.Təbrizli
www.anews.az
Bizi sosial şəbəkələrdə izləyin !
