FIFA Mərkəzi Asiya üzrə regional ofisini Daşkənddə açacaq

Beynəlxalq Futbol Federasiyası (FIFA) 2027-ci ildə Azərbaycanla birgə keçiriləcək U-20 dünya çempionatına hazırlıq çərçivəsində Mərkəzi Asiya ölkələri üzrə regional ofisini Özbəkistanın paytaxtı Daşkənddə açacaq. Bu barədə prezident fərmanında bildirilir.

Qərar “2027-ci il FIFA U-20 dünya çempionatının hazırlanması və keçirilməsi ilə bağlı tədbirlər haqqında” fərmanla təsdiqlənib və turnirin beynəlxalq standartlara uyğun təşkili, eləcə də Özbəkistanın FIFA və Asiya Futbol Konfederasiyası (AFC) xətti ilə iri yarışların keçirilməsində rolunun gücləndirilməsini nəzərdə tutur.

Mərkəzi Asiya üzrə FIFA Regional Ofisi Daşkənddə Özbəkistan Futbol Assosiasiyasının (UFA) binasında ödənişsiz əsaslarla yerləşdiriləcək.

Ofisin yaradılması və fəaliyyəti ilə bağlı xərclərin əsas hissəsi FIFA tərəfindən maliyyələşdiriləcək. Qalan xərclər isə Özbəkistan Futboluna Dəstək Fondu tərəfindən ödəniləcək və bu fondun payı ümumi əməliyyat xərclərinin 50%-indən çox olmayacaq.

Ofis üçün nəzərdə tutulan binanın təmiri, mebel, avadanlıq, texniki vasitələr və nəqliyyat vasitələrinin təmin edilməsi Yenidənqurma və İnkişaf Fondu hesabına həyata keçiriləcək. Ofisin minimal fəaliyyət tələblərini Özbəkistan Futbol Assosiasiyası müəyyən edəcək.

Rəsmilər bildiriblər ki, regional ofisin açılması Mərkəzi Asiya ölkələrinin futbol assosiasiyaları ilə koordinasiyanı gücləndirəcək və 2027-ci il U-20 dünya çempionatına hazırlıq prosesinə dəstək verəcək.

N.Təbrizli