Tələbənin universitetdən qovulması səhv addımdır - AÇIQLAMA

27.11.2020 15:43

Online dərs zamanı başına bayrağı doluyaraq oynuyan Bakı Dövlət Universitetinin birinci kurs tələbəsi Pərviz Məhəmmədov universitetdən qovulub. Onun qovulmasına səbəb isə bayrağı bu şəkildə təhqir etməsi göstərilib. Bakı Dövlət Univetsiteti açıqlama yayıb ki, Pərviz Məhəmmədov bir necə dəfə nizam intizamı pozduğuna görə ona xəbərdarlıq edilib. Lakin bu dəfə dövlət atributunu başına doladığına görə bu BDU tərəfindən təhqir kimi hesab edilərək tələbə qovulub.

Bəs əslində bu durumda tələbənin qovulması doğru qərardımı? Anews.az bu məsələni araşdırmağa çalışıb.

Hüquqşunas Ələsgər Məmmədli bildirib ki, bu hadisəni bayrağın təhqir edilməsi kimi təqdim etmək yalnış addımdır.

"Hadisəni gördüm. Düşünürəm ki, tələbənin qovulması üçün hər hansı zəruri məqam yoxdur. Əslində araşdırmaq lazımdır ki, o tələbə doğurdanmı bayrağı təhqir etmək fikrində olub.Bəlkə küçədə olan sevincini ekrana daşımaq olub niyyəti? Onu universitetdən qovmaq asan və eyni zamanda problem yaradan məqamdır.Çünki o tələbəni yetişdirməklə cəmiyyətə bir mütəxəssis vermək əvəzinə bir səhvinə görə bütün şansını əlindən almış olurlar.

Ələsgər Məmmədli onu da əlavə etdi ki, bayrağı təhqir etmək başqa cür olur.

"Yerə atıb təpikləmək, yandırmaq və daha iyrənc formada olan görüntü bayrağın təhqir edilməsi hesab edilə bilər.Bayrağı başına dolamaq və üzərinə eynək taxmaq isə tələbənin bir az komik görünmək istəyi də ola bilər. Qanuni olaraq tələbə təhsil hüququnun bərpası üçün məhkəməyə müraciət edərək universitetə təhsil almaq üçün qayıtmasını bərpa edə bilər”

Təhsil eksperti Kamran Əsədov isə bu hadisəni çox pis hal kimi qeyd edir və Bakı Dövlət Universtitetinin atdığı addımı doğru qiymətlənidirir.

"Həmən tələbə dövlət atributuna, xüsusilə dövlət bayrağına aşkar və nümayişkəranə şəkildə hörmətsizlik ifadə edib və təhqir edib ki, bu da birbaşa cinayət məsuliyyətinə tövsiyə olunur. Bundan başqa tələbə tədrisin normal gedişinə aşkar şəkildə maneə yaradır ki, bu da daxili nizam-intizam qaydalarına, tədrisin təşkili qaydalarına ziddir və buna görə də tələbə təhsil müəssisədən xaric olunmalıdır. Belə bir kadr sabah əmək bazarında heç bir peşəkar kadr ola bilməz” deyə ekspert bildirib.

Məsələ ilə bağlı Təhsil Nazirliyi ilə əlaqə saxladıq. Mətbuat xidmətinin rəhbəri Cəsarət Vəliyev bildirdi ki, onların ümumiyyətlə hadisədən xəbəri yoxdur və buna görə də bu haqda heç bir münasibət bildirə bilmiyəcəklər.

www.anews.az

Xəbəri bəyəndiniz?

Sosial şəbəkələrdə paylaş