Bu barədə yerli hakimiyyət orqanları məlumat yayıb. Lakin hansı müəssisələrin hücuma məruz qaldığı barədə dəqiq açıqlama verilməyib. "Bu səhər düşmən PUA-ları respublikanın sənaye obyektlərinə hücum etməyə cəhd göstərib. Müdafiə tədbirləri görülüb və nəticədə bütün pilotsuz uçuş aparatları zərərsizləşdirilib. Ölən və ya dağıntı yoxdur”, –  Tatarıstan rəhbəri Rustam Minnihanovun mətbuat xidməti bildirib.

Bununla belə, yerli mətbuat Kazanın Aviatəhsil rayonunda bir neçə partlayış dalğasının baş verdiyini yazıb. Burada iri aviasiya istehsalı müəssisələri fəaliyyət göstərir. PUA hücumu səbəbindən Kazan və Nijnekamsk hava limanlarının fəaliyyəti müvəqqəti dayandırılıb.

Bəzi Rusiya Telegram-kanalları Kazan Qorbunov adına Aviasiya Zavodunun hücuma məruz qaldığını bildirib. Bu müəssisədə strateji raketdaşıyan bombardmançılar Tu-160, habelə uzun mənzilli Tu-22M3M/Tu-22M3 bombardmançıları istehsal edilir və təmir olunur.

Kaluga vilayətinin qubernatoru Vladislav Şapşa bölgədəki müəssisələrdən birinin hücuma məruz qaldığını və yanğının baş verdiyini bildirib. "Kaluga kənarında PUA qalıqları zavod ərazisinə düşüb. Kiçikmiqyaslı yanğın operativ şəkildə söndürülüb”, – Şapşa açıqlama verib.