Leyla Əliyeva Efiopiyaya səfər edib

 Leyla Əliyeva Efiopiya Federativ Demokratik Respublikasında səfərdədir. Onu Efiopiyanın planlaşdırma və inkişaf naziri Fitsum Assefa Adela qarşılayıb.

Səfər çərçivəsində Leyla Əliyevanın şərəfinə ənənəvi Efiopiya qəhvə mərasimi təşkil olunub, qonaqlara ölkənin qədim qəhvə ritualı təqdim edilib.

Leyla Əliyeva daha sonra Efiopiya Elm Muzeyini ziyarət edib. Muzeydə onu Baş nazirin ofisinin rəhbəri və kabinet işləri naziri Alemtsehay Paulos qarşılayıb. 2022-ci ilin oktyabrında açılan, 7 hektar ərazini əhatə edən və 80%-i yaşıl sahə olan kompleks elmi-tədqiqat mərkəzi kimi fəaliyyət göstərir. Muzeydə interaktiv eksponatlar, planetarium və günəş panelləri mövcuddur. Rəsmilərin məlumatına görə, indiyədək 7 milyon uşaq muzeyi ziyarət edib.

Səfər proqramı çərçivəsində Leyla Əliyeva Adva Zəfər Muzey Kompleksində də olub. Memorial 1896-cı il martın 1-də Adva döyüşündə Efiopiyanın İtaliya üzərində qələbəsinə həsr olunub. Kompleksdə imperator II Menelik, imperatriçə Taytu Bitul və dövrün 12 generalının heykəlləri, habelə nadir tarixi artefaktlar nümayiş etdirilir. Muzeydə pan-afrikaçılığa dair xüsusi bölmə də yer alır.

Leyla Əliyeva, həmçinin Əddis-Əbəbənin ən böyük istirahət zonalarından biri olan “Dostluq” Parkını ziyarət edib. Parkdakı musiqili fəvvarə təqdimatı zamanı Azərbaycan xalq mahnıları səsləndirilib.