Vəfa Quluzadə Jirinovskinin məhkəməyə verilməsindən danışdı

Məsələyə münasibət bildirən politoloq Vəfa Quluzadə Aktual.az-a açıqlamasında bildirib ki, məhkəmə iddianı formal olaraq qəbul edib:

“Məhkəmə prosesinin nəticəsi olmayacaq. Yaxşı bir vəkil bütün ittihamları bir yerə cəmləyib məhkəmədə Jirinovskinin “başına çırpsa”, bundan sonra, heç olmasa, bizim yerli mətbuat və Rusiya qəzetləri onun necə murdar adam olduğunu yazıb çap etsələr, pis olmaz. Amma Putinin dostuna kim nə deyə bilər?”

Politoloq Qabil Hüseyinli də deyir ki, Jirinovskinin Kremlin ruporu olduğunu nəzərə alsaq, məhkəmədə ona qalib gəlmək sual altındadır:

“Məhkəmə onu qınayan və yaxud üzr istəməyə vadar edən addım ata bilər. Nəzərə alsaq ki, Jirinovski Kremlin ruporudur və onun sifarişlərini yerinə yetirir, məhkəmənin, bütövlükdə, sərt tədbirlər görəcəyini güman etmirəm. Məhkəmə də Kremlin sifarişini yerinə yetirəcək. Bir sözlə, Jirinovskiyə qalib gəlmək asan deyil”.

Q. Hüseyinlinin sözlərinə görə, əgər məhkəmə parlamentdən onun toxunulmazlıq hüququnu üzərindən götürməyi xahiş etsə, ədalət naminə nə isə ediləcəyini güman etmək olar:

“Mən Jirinovskini məhkəməyə verən ailənin bu addımını yüksək qiymətləndirirəm. Bunu vətənpərvətlik, milli təəssübkeşlik nümunəsi sayıram və alqışlayıram. Amma, təəssüflər olsun ki, Rusiyadakı bu günkü reallıq, millətimizi təhqir edən dövlət rəsmisini cəzalandırmaq iqtidarında deyil.

Jirinovskinin deputat toxunulmazlığı qaldığı halda, məhkəmə, ən uzağı, deklorativ nə isə bəyan etməklə məsələni qapadacaq. Məhkəmə Dumaya müraciət etməlidir. Duma da, öz növbəsində, bu məsələni müzakirə edərək, Jirinovskinin səsləndirdiyi fikirləri intizam komissiyasına, yaxud da, ümumilikdə, parlamentin iclasına çıxara bilər”. 

Qeyd edək ki, 2014-cü ilin martında Rusiya Dövlət Dumasında çıxışı zamanı Jirinovski azərbaycanlıları kaspilər (xəzərlər – red.) adlandırmış, daha sonra isə belə bir xalqın, ümumiyyətlə, olmadığını bildirmişdi.