Lockheed Martin MC-130J Commando II Bakıya niyə gəlib?

ABŞ Hərbi Hava Qüvvələrinə məxsus azı 20 hərbi-nəqliyyat təyyarəsi ABŞ-ın vitse-prezidenti Cey Di Vensin regiona səfəri ərəfəsində Ermənistan və Azərbaycana eniş edib. Bu barədə Flightradar məlumatları göstərir.

Müşahidələrə əsasən, uçuşların böyük hissəsi fevralın 4–8-i tarixlərində həyata keçirilib. ABŞ-a məxsus 12 hərbi-nəqliyyat təyyarəsi Ermənistana, 9 təyyarə isə Azərbaycana gəlib. Təyyarələr əsasən ABŞ bazalarından havaya qalxaraq Almaniyadakı Ramştayn aviabazasında yanacaq doldurub.

Reyslərin əksəriyyəti 77,5 tona qədər yük daşımaq imkanına malik Boeing C‑17A Globemaster III təyyarələri ilə həyata keçirilib.

Bundan əlavə, ABŞ HHQ-nin xüsusi əməliyyat qüvvələri üçün nəzərdə tutulmuş Lockheed Martin MC‑130J Commando II təyyarəsinin də Yerevan və Bakıya uçuşları qeydə alınıb. Daha iki oxşar reys Gürcüstana edilib.

ABŞ-ın vitse-prezidenti Cey Di Vens 9–10 fevral tarixlərində rəsmi səfərlə Ermənistanda olacaq. Bu gün onun Ermənistanın baş naziri **Nikol Paşinyan**la görüşü planlaşdırılır. Daha sonra Vensin 10–11 fevral tarixlərində Azərbaycana səfəri gözlənilir.

N.Təbrizli