ABŞ İrana qarşı “iqtisadi D günü”nə başlayır - maliyyə naziri

ABŞ İranın hərbi və nüvə imkanlarına zərbə vurduqdan sonra Tehran üzərində iqtisadi təzyiqi əhəmiyyətli dərəcədə artırmağa hazırlaşır.

ABŞ maliyyə naziri Skott Besant bildirib ki, Prezident Donald Trampın rəhbərliyi ilə İranın hərbi imkanları əhəmiyyətli dərəcədə zəiflədilib və nüvə proqramına ciddi zərbə vurulub. Onun sözlərinə görə, ABŞ indi qarşıdurmanın “son mərhələsinə” daxil olur.

Besant bu mərhələni İrana qarşı “iqtisadi D günü” adlandırıb və bunun ABŞ-ın indiyədək hər hansı rəqibə qarşı həyata keçirdiyi ən böyük maliyyə hücumu olacağını bildirib.

Onun sözlərinə görə, Vaşinqtonun məqsədi İran hakimiyyətini dəstəkləyən bütün iqtisadi kanalları kəsmək və Tehranı beynəlxalq iqtisadi sistemdən təcrid etməkdir.

“Tehranla qarşıdurmadan qorxanlar Vaşinqtonu sınamağın dəyərini qiymətləndirməməlidirlər”, – Besant bildirib.

ABŞ maliyyə naziri həmçinin İranla iqtisadi əlaqələri davam etdirən ölkə və şirkətlərin də təzyiqlərlə üzləşə biləcəyinə işarə edib. Reuters-in məlumatına görə, Vaşinqtonun yeni tədbirləri İranın ticarət tərəfdaşlarına qarşı ikinci dərəcəli sanksiyaları da əhatə edə bilər.

ABŞ son günlər İran iqtisadiyyatına qarşı “tarixdəki ən sərt sanksiyalar” paketini hazırladığını açıqlayıb. Vaşinqton bu tədbirlərlə İranın neft gəlirlərinə, maliyyə əməliyyatlarına və digər iqtisadi əlaqələrinə təzyiq göstərməyi hədəfləyir.

İran isə ABŞ-ın yeni sanksiya planını rədd edib. İran xarici işlər naziri Abbas Əraqçi bu tədbirlərin nəticə verməyəcəyini və Vaşinqtonun təzyiq siyasətinin uğursuzluğa məhkum olduğunu bildirib.

ABŞ və İran arasında qarşıdurma fonunda Hörmüz boğazında gəmiçilik də ciddi şəkildə pozulub və İran iqtisadi müharibənin davam edəcəyi təqdirdə körfəzdən neft ixracını dayandıra biləcəyi barədə xəbərdarlıq edib.

Gülnar Nazimqızı