Ermənistan parlamentində müxalifət iclası boykot edib

Ermənistan parlamentində müxalif “Güclü Ermənistan” və “Ermənistan” bloklarının deputatları avqustun 25-də keçirilən iclası boykot edib. 

Müxalifətin qərarı Baş nazir Nikol Paşinyanla hakim “Vətəndaş Müqaviləsi” partiyasının deputatları ilə parlamentdə yaşanan gərginlikdən sonra verilib.

Müxalifət deputatlarının sözlərinə görə, Paşinyanın əvvəlki gün parlamentdə bütün ermənilərin katolikosu II Qareginə dünyəvi adı ilə müraciət etməsi kilsə ənənələrinə hörmətsizlik olub. Baş nazirin bu ifadəsini bir neçə dəfə təkrarlaması müxalif deputatların etirazına səbəb olub.

İclas zamanı müxalifət deputatları masaları döyərək etiraz edib, daha sonra “Güclü Ermənistan” fraksiyasının üzvləri zalı tərk edib. Hakim partiyanın deputatlarının Paşinyanı alqışladığı və müxalifətə yönəlik ifadələr səsləndirdiyi bildirilib.

Parlamentdəki gərginlik Baş nazir Nikol Paşinyanla müxalif deputatlar arasında son günlərdə artan qarşıdurma fonunda baş verir. Avqustun 24-də Paşinyanla “Güclü Ermənistan” fraksiyasının deputatı Levon Köçəryan arasında da mübahisə yaranıb. Paşinyan parlamentdə Köçəryanın əmlakının müsadirə ediləcəyini bildirib.

 Parlamentdəki siyasi qarşıdurma Ermənistanın ikinci prezidenti Robert Köçəryan və onun böyük oğlu Sedrak Köçəryanın həbsi ilə eyni vaxta təsadüf edir. Ermənistanın Korrupsiyaya Qarşı Mübarizə Komitəsi avqustun 25-də cinayət işi çərçivəsində ölkə üzrə bir neçə onlarla ünvanda axtarış və digər prosessual tədbirlərin aparıldığını açıqlayıb.

Köçəryan və oğlunun həbsi ilə bağlı istintaqın detalları və onlara qarşı irəli sürülən ittihamların mahiyyəti barədə əlavə məlumat açıqlanmayıb.

Gülnar Nazimqızı