Türkiyədə 3 jurnalist "Ərdoğan vəfat edib" yazdığına görə saxlanılıb

Türkiyənin Aydın şəhərində yerli qəzetin sosial media hesabında Prezident Rəcəb Tayyib Ərdoğanın vəfat etməsi təəssüratı yaradan paylaşımın yayılmasından sonra üç jurnalistin saxlanılması barədə qərar verilib.

“Aydın Denge” qəzetinin “Facebook” hesabında avqustun 25-də qara fonda “Ərdoğan vəfat edib” ifadəsinin yer aldığı görüntü paylaşılıb.

Paylaşımın yayılmasından sonra Aydın Respublika Baş Prokurorluğu tərəfindən araşdırma başlanıb. İstintaq Türkiyə Cinayət Məcəlləsinin 217/A maddəsində nəzərdə tutulan “xalqı yanıldan məlumatı açıq şəkildə yayma” cinayəti üzrə aparılır.

Qəzetin internet saytında yerləşdirilən xəbərin isə Gülşən Ərdoğan adlı şəxsin ölüm elanı ilə bağlı olduğu bildirilib. Buna baxmayaraq, sosial media paylaşımında yalnız “Ərdoğan vəfat edib” ifadəsinin yer alması Prezident Rəcəb Tayyib Ərdoğanın öldüyü barədə yanlış təsəvvür yaradıb.

İstintaq çərçivəsində qəzetin nümayəndəsi, məsul redaktoru və müxbirinin saxlanılması barədə qərar verilib.

Gülnar Nazimqızı