ABŞ və İran həftələrdən sonra yenidən genişmiqyaslı əməliyyatlara başlayıb

ABŞ və İran çərşənbə axşamı qarşılıqlı zərbələr endirib və bununla da tərəflər arasında iyuldan bəri davam edən nisbi sakitlikdən sonra hərbi qarşıdurma yenidən kəskinləşib.

ABŞ Mərkəzi Komandanlığı (CENTCOM) İran İslam İnqilabı Keşikçiləri Korpusunun (SEPAH) hava hücumundan müdafiə mövqeləri, radar sistemləri, dəniz obyektləri, mina yerləşdirmə imkanları və rabitə qurğuları da daxil olmaqla bir sıra hərbi hədəflərə zərbələr endirdiyini bildirib.

CENTCOM əməliyyatın Hörmüz boğazında kommersiya gəmilərinə və ABŞ hərbçilərinə qarşı son hücum cəhdlərinə cavab olduğunu bildirib.

İran mediası ölkənin müxtəlif bölgələrində, əsasən strateji əhəmiyyətli Hörmüz boğazı yaxınlığında bir sıra obyektlərin vurulduğunu bildirib.

Tehran cavab olaraq İordaniya və İraqdakı ABŞ hərbi obyektlərinə zərbələr endirdiyini açıqlayıb. İran mediası Bəhreyndəki ABŞ obyektlərinin də hədəfə alındığını bildirib. İordaniya 13 ballistik raketdən 10-nun vurulduğunu, Bəhreyn isə İran dronlarının zərərsizləşdirildiyini açıqlayıb. ABŞ rəsmiləri ilkin məlumatlara əsasən İordaniyadakı hücum nəticəsində amerikalılar arasında itki olmadığını bildiriblər.

ABŞ Prezidenti Donald Tramp son zərbələrdən sonra Vaşinqtonun Hörmüz boğazında mövqeyinin gücləndiyini bildirib və İran iqtisadiyyatının ağır vəziyyətdə olduğunu deyib. İran hərbi rəhbərliyi isə ABŞ-ın bölgədə əməliyyatlarını davam etdirəcəyi təqdirdə daha geniş və dağıdıcı cavab veriləcəyi barədə xəbərdarlıq edib.

Hörmüz boğazı dünya neft və mayeləşdirilmiş təbii qaz tədarükünün əsas marşrutlarından biridir və bölgədə hərbi qarşıdurmanın genişlənməsi qlobal enerji bazarlarında təchizatla bağlı narahatlığı artırıb.

Gülnar Nazimqızı