Almaniyanın Peterburqdakı baş konsulluğunun fəaliyyəti dayandırılır

Rusiya Almaniyanın Sankt-Peterburqdakı baş konsulluğunun fəaliyyətinə verdiyi icazəni ləğv edib.Bu barədə Rusiya Xarici İşlər Nazirliyi (XİN) məlumat yayıb.

Bildirilib ki, Almaniyanın Sankt-Peterburqdakı baş konsulluğu sentyabrın 18-dən gec olmayaraq fəaliyyətini dayandırmalı, bütün əməkdaşları isə Rusiyanı tərk etməlidir.

Bundan başqa, Rusiya ərazisində fəaliyyət göstərən Höte İnstitutunun mədəniyyət mərkəzlərinin də bağlanması tələb olunub. Mərkəzlərin ezam olunmuş əməkdaşları sentyabrın 13-dən gec olmayaraq ölkəni tərk etməlidirlər.

“Diplomatik missiyanın rəhbərinə Rusiya XİN-in müvafiq notaları təqdim edilib”, - məlumatda qeyd olunub.

Rusiya XİN bildirib ki, qərar Almaniyanın sentyabrın 7-də Rusiyanın Bonndakı baş konsulluğunun və Berlindəki Rusiya Elm və Mədəniyyət Evinin bağlanmasına cavab olaraq qəbul edilib.