Britaniya hava limanlarında texniki nasazlıq: Yüzlərlə reys gecikir

Böyük Britaniyanın bir sıra iri hava limanlarında hava hərəkətinin idarə edilməsi sistemində yaranan texniki nasazlıq səbəbindən uçuşlarda gecikmələr və ləğvlər baş verib.Bu barədə "NBC News" məlumat yayıb.

Problemdən Londonun Hitrou və Qatvik, eləcə də Mançester, Edinburq və digər hava limanları təsirlənib. Sərnişinlərə uçuşlarının statusunu aviaşirkətlərdən dəqiqləşdirmək tövsiyə olunub.

Hitrou hava limanının rəhbərliyi problemin aradan qaldırılması üçün Böyük Britaniyanın Milli Hava Hərəkətinin İdarəedilməsi Xidməti (NATS) ilə birgə çalışdıqlarını bildirib.

NATS isə mühəndislərin sistemə düzəliş etdiyini və bundan sonra uçuşların emalı sisteminin bərpa olunmağa başladığını açıqlayıb. Bununla belə, xidmət uçuşların normal qrafikə qayıtmasının müəyyən vaxt aparacağını bildirib.

"Ryanair" aviaşirkətinin məlumatına görə, nasazlıq səbəbindən təxminən 65 min sərnişin təsirlənib, 50 reys isə ləğv olunub.