Türkiyədə cinayətkar qruplaşmalara qarşı əməliyyatlarda 1 613 şübhəli saxlanılıb

Türkiyədə cinayətkar qruplaşmalara qarşı keçirilən əməliyyatlar çərçivəsində 1 613 şübhəli saxlanılıb.Bu barədə Türkiyənin ədliyyə naziri Akın Gürlek "X" sosial şəbəkə hesabında məlumat verib.

Gürlek bildirib ki, ölkə üzrə 78 Baş Prokurorluğun koordinasiyası ilə 151 əməliyyat keçirilib və ümumilikdə 2 594 şübhəli barədə hüquqi tədbir görülüb. Onlardan 1 613-ü saxlanılıb, 618 nəfər barəsində isə axtarış qərarı verilib.

Əməliyyatlar zamanı 199 odlu silah, 9 039 patron və mərmi, iki əl qumbarası, 10 520 sintetik narkotik vasitə və narkotik həb, həmçinin 37,25 kiloqrama yaxın narkotik maddə aşkarlanaraq götürülüb.

Nazirin sözlərinə görə, araşdırmalar zamanı cinayətkar qruplaşmaların 26,9 milyard türk lirəsi həcmində maliyyə dövriyyəsi müəyyən edilib.

Bundan başqa, 408 bank hesabı, 35 daşınmaz əmlak, 31 nəqliyyat vasitəsi və 10 şirkətə qarşı müsadirə tədbiri tətbiq olunub.

Gürlek bildirib ki, əməliyyatlardan yayınan şübhəlilərin saxlanılması və araşdırmaların davam etdirilməsi istiqamətində tədbirlər görülür.