Tramp Süni İntellekt Qüvvələrinin yaradıldığını açıqlayıb

ABŞ Prezidenti Donald Tramp süni intellekt sahəsinə nəzarət etmək məqsədilə Süni İntellekt Qüvvələrinin yaradıldığını açıqlayıb.

Tramp bu barədə "Truth Social" sosial şəbəkəsindəki paylaşımında bildirib.

"Biz bu inanılmaz sənayenin inkişafına heç bir halda mane olmayacaq və ya onu ləngitməyəcəyik. Əksinə, onu dəstəkləyəcək və inkişaf etdikcə nəzarətdə saxlayacağıq. Bununla yanaşı, qanun pozuntularını mövcud cinayət və mülki ədliyyə sistemimiz vasitəsilə araşdıracağıq", – Tramp yazıb.

ABŞ Prezidenti yeni strukturun onun ilk hakimiyyət müddətində yaradılan Kosmik Qüvvələr nümunəsində formalaşdırıldığını qeyd edib.

Tramp süni intellekti yeni sənaye inqilabı adlandırıb və bu sahənin ABŞ-nin ümumi daxili məhsulunun 25%-nə qədərini əhatə edə biləcəyini bildirib.

"Biz Çin və dünyanın qalan hissəsini qabaqlayırıq və bu üstünlüyü qoruyub saxlamaq niyyətindəyəm", – o vurğulayıb.

Tramp yaxın vaxtlarda yeni strukturun rəhbərini təyin edəcəyini açıqlayıb.