ABŞ səfirlikləri vətəndaşlara Yaxın Şərqdə eskalasiya barədə xəbərdarlıq edib

ABŞ-nin Yaxın Şərqdəki bir sıra diplomatik nümayəndəlikləri regionda gərginliyin artması fonunda Amerika vətəndaşlarını yüksək ayıqlıq nümayiş etdirməyə çağırıb.

Müvafiq xəbərdarlıqlar ABŞ-nin İordaniya, İsrail, İraq, Qətər, Bəhreyn, Səudiyyə Ərəbistanı, Oman, Birləşmiş Ərəb Əmirlikləri (BƏƏ) və Livandakı diplomatik nümayəndəlikləri tərəfindən yayımlanıb.

Xəbərdarlıqlarda Yaxın Şərqdə təhlükəsizlik vəziyyətinin mürəkkəb olaraq qaldığı və gözlənilməz eskalasiya riskinin mövcud olduğu bildirilib.

Diplomatik nümayəndəliklər İranın dəstəklədiyi Yəmənin “Ənsar Allah” hərəkatının (husilər) Səudiyyə Ərəbistanına qarşı hücumlar həyata keçirdiyini və mülki hava limanlarını hədəfə aldığını qeyd edib. Onların qiymətləndirməsinə görə, münaqişənin daha genişmiqyaslı qarşıdurmaya çevrilməsi mümkündür.

ABŞ vətəndaşlarına yüksək ayıqlıq nümayiş etdirmək, mümkün aviareys ləğvlərinə, hava məkanının bağlanmasına və nəqliyyat əlaqələrində fasilələrə hazır olmaq tövsiyə edilib.

Xəbərdarlıqlarda həmçinin ABŞ-nin diplomatik nümayəndəliklərinin, o cümlədən Yaxın Şərqdən kənarda yerləşən diplomatik obyektlərin hücum hədəfinə çevrilə biləcəyi bildirilib. Qeyd olunub ki, İran və onun dəstəklədiyi qruplaşmalar ABŞ-nin xaricdəki digər obyektlərini, eləcə də dünya üzrə Birləşmiş Ştatlar və amerikalılarla əlaqəli məkanları hədəfə ala bilər.

Qeyd edək ki, ABŞ diplomatik nümayəndəlikləri regionda təhlükəsizlik vəziyyətinin gərginləşməsi ilə əlaqədar vaxtaşırı oxşar xəbərdarlıqlar yayımlayır.