Türkiyə Başika-Zilkan bazasını İraqa təhvil verəcək

Türkiyə Silahlı Qüvvələri İraqın şimalındakı Başika-Zilkan bazasını mərhələli şəkildə İraq Federal Hökumətinə təhvil verəcək.Bu barədə Türkiyə Prezidenti Rəcəb Tayyib Ərdoğan və İraqın Baş naziri Əli əl-Zeydinin Nyu-Yorkda keçirilən görüşündən sonra yayılan birgə açıqlamada bildirilib.

Açıqlamada qeyd olunub ki, tərəflər iki ölkə arasındakı strateji münasibətləri bütün aspektləri ilə müzakirə edib və təhlükəsizlik sahəsində əməkdaşlığın dərinləşdirilməsi barədə razılığa gəliblər.

Bildirilib ki, İraqın təhlükəsizlik sahəsində atdığı addımlar çərçivəsində Sincarda dövlət hakimiyyətinin tam bərqərar edilməsi və qadağan olunmuş xarici silahlı ünsürlərin mövcudluğuna son qoyulması nəzərdə tutulur.

"İraqın təhlükəsizlik sahəsində atdığı addımlardakı irəliləyişə uyğun olaraq, razılaşdırılmış mexanizm və qrafik əsasında Türkiyə Silahlı Qüvvələri Başika-Zilkan bazasını mərhələli şəkildə İraq Federal Hökumətinə təhvil verəcək", - açıqlamada deyilir.

Tərəflər həmçinin ikitərəfli ticarət və investisiyaların həcminin artırılması, imzalanmış sazişlərin icrasının sürətləndirilməsi və xüsusilə İnkişaf Yolu Layihəsi olmaqla birgə strateji layihələrin həyata keçirilməsinin sürətləndirilməsi barədə razılığa gəliblər.