İsrailin ABŞ-dəki səfirinin oğlu hücum zamanı xəsarət alıb

İsrailin ABŞ-dəki səfiri Yexiel Leyterin oğlu Neriah Leyter İordan çayının Qərb sahilində nəzarət-buraxılış məntəqəsinə avtomobillə hücum zamanı ağır yaralanıb.Bu barədə "The Jerusalem Post" xəbər verir.

ABŞ vətəndaşlığı da olan Neriah Leyter İsrail ordusunun ehtiyat hərbi qulluqçusudur.

Hadisə Modiinin yaxınlığındakı Makkabim nəzarət-buraxılış məntəqəsində baş verib. Məlumata görə, avtomobil məntəqədə xidmət aparan hərbçiyə çırpılıb. Ağır xəsarət alan Leyter Qüdsdəki Şaare Zedek Tibb Mərkəzinə çatdırılıb və onun vəziyyəti ağır olaraq qiymətləndirilir.

Məlumata görə, hücumu törədən şəxs Fələstinin Beyt-Ur ət-Taxta kəndindən olan 29 yaşlı Mahmud Məhəmməd Mahmud Süleyman olub. O, hadisə yerində öldürülüb.

İsrail səfirinin böyük oğlu, mayor rütbəli Moşe Yedidya Leyter isə 2023-cü ilin noyabrında Qəzza zolağında gedən döyüşlər zamanı həlak olub. O, İsrail ordusunda xidmət edib.