BƏƏ İran aviaşirkətlərinin uçuşlarını dayandırıb

Birləşmiş Ərəb Əmirlikləri (BƏƏ) İran aviaşirkətlərinin ölkəyə və ölkədən uçuşlarını sentyabrın 24-dən etibarən növbəti bildirişədək dayandırıb.Bu barədə BƏƏ-nin Mülki Aviasiya İdarəsi məlumat yayıb.

Qərarın ABŞ-nin İran aviaşirkətlərinin dünyanın müxtəlif ölkələrindəki hava limanlarından istifadəsinə tətbiq etdiyi məhdudiyyətlər fonunda qəbul edildiyi bildirilib.

İran mediasının məlumatına görə, BƏƏ-yə bütün reyslər gecə yarısından etibarən ləğv edilib. Biletləri satılmış “Iran Airtour” aviaşirkətinin Tehran-Dubay reysi də uçuşa az qalmış ləğv olunub.

ABŞ Maliyyə Nazirliyi sentyabrın 8-də İranın aviasiya sektoruna qarşı sanksiyalar tətbiq edib. Nazirliyin məlumatına görə, məhdudiyyətlər 27 İran aviaşirkətini əhatə edib. Vaşinqton İran aviaşirkətlərinə yanacaq doldurulması, eniş xidmətlərinin göstərilməsi və bilet satışını davam etdirən xarici şirkətlərin ABŞ dolları əsaslı maliyyə sistemindən kənarlaşdırıla biləcəyi barədə xəbərdarlıq edib.

ABŞ-nin yeni məhdudiyyətlərinin qüvvəyə minməsindən sonra İranın bəzi qonşu ölkələrə, o cümlədən İraq və Omana uçuşları dayandırılıb. Azərbaycan və Gürcüstan da İran aviaşirkətlərinin reyslərinə məhdudiyyətlər tətbiq edib.