Şahbaz Şərif və Pezeşkian Nyu-Yorkda regional vəziyyəti müzakirə ediblər

Pakistanın Baş naziri Şahbaz Şərif və İran Prezidenti Məsud Pezeşkian Nyu-Yorkda BMT Baş Assambleyasının 81-ci sessiyası çərçivəsində görüşərək Pakistan-İran münasibətlərini və regional vəziyyəti müzakirə ediblər.Bu barədə Şahbaz Şərif “X” sosial şəbəkəsindəki hesabında paylaşım edib.

Şərif bildirib ki, görüş zamanı tərəflər Pakistan və İran arasında uzunmüddətli əlaqələri və qarşılıqlı maraq doğuran sahələrdə əməkdaşlığın gücləndirilməsinə sadiqliklərini təsdiqləyiblər.

Tərəflər həmçinin regionda baş verən son proseslərlə bağlı fikir mübadiləsi aparıblar.

Şərif regional münaqişənin uzanmasından narahatlığını ifadə edərək gərginliyin azaldılması və diplomatik səylərin davam etdirilməsinin vacibliyini vurğulayıb.

Pakistanın baş naziri İslamabad Anlaşma Memorandumunun icrasının vacibliyini qeyd edib və ölkəsinin regional sülh və sabitliyin təmin olunması istiqamətində konstruktiv rolunu davam etdirəcəyini bildirib.

Görüşdə tərəflər regional sülh, təhlükəsizlik və sabitliklə bağlı məsələlər üzrə məsləhətləşmələrin davam etdirilməsinin vacibliyini vurğulayıblar.