Tramp İrana qarşı sanksiyaları yumşaltmağa hazırdır - Axios

ABŞ Prezidenti Donald Tramp İranın nüvə proqramında konkret irəliləyiş əldə olunacağı təqdirdə ölkəyə qarşı sanksiyaların yumşaldılmasına və dondurulmuş vəsaitlərin blokdan çıxarılmasına razı ola bilər.Bu barədə ABŞ rəsmisinə istinadən “Axios”un müxbiri Barak Ravid “X”də yazıb.

Ravidin məlumatına görə, Tramp administrasiyası İranın nüvə proqramı ilə bağlı konkret irəliləyiş müqabilində sanksiyaların yumşaldılması və dondurulmuş vəsaitlərin azad edilməsini nəzərdən keçirir.

Bundan əvvəl Tramp İranın Hörmüz boğazında gəmiçiliyin bərpası ilə bağlı təklifini rədd etdiyini bildirib. İranın təklifinin ABŞ-ın İrana qarşı dəniz blokadasını dayandırmasını, neft satışına tətbiq olunan sanksiyaları aradan qaldırmasını və digər güzəştlərə getməsini nəzərdə tutduğu bildirilib.

Tramp daha əvvəl də İranın nüvə silahına malik olmasına imkan verilməyəcəyini bəyan edib.