Ermənistanda azərbaycanlı hərbçi 2 ay müddətinə həbs olunub - Yenilənib

Azərbaycan Respublikasının vətəndaşı Nəsimi Rəhim oğlu Musayev Ermənistanda 2 ay müddətinə həbs edilib.

14:12

Ermənistanda Azərbaycan vətəndaşı, hərbçi Nəsimi Rəhim oğlu Musayev barəsində həbs qətimkan tədbirinin seçilməsi üçün məhkəməyə vəsatət təqdim edilib. Bu barədə Cinayət Təhqiqatları Departamenti məlumat yayıb. 

Ermənistanın Baş Prokurorluğu daha əvvəl, oktyabrın 2-də Nəsimi Musayev barəsində bir sıra maddələrlə cinayət təqibinə başlanıldığını açıqlayıb. Söhbət dövlət sərhədini qanunsuz keçmə, hərbi məhsullar və silahların qaçaqmalçılığı, odlu silah və sursatın qanunsuz dövriyyəsi, mənzil toxunulmazlığının pozulması və sağlamlığa ağır zərər vurma ilə bağlı maddələrdən gedir.

Ermənistan tərəfinin məlumatına görə, hadisə oktyabrın 1-də Sünik vilayətinin Sisian icmasının Şəki kəndində baş verib. İstintaqın ilkin versiyasına əsasən, Azərbaycan vətəndaşı yaşayış evinə qanunsuz daxil olub və aşkar edildikdən sonra atəş açıb. Nəticədə 1987-ci il təvəllüdlü A.A. yaralanıb. Musayev daha sonra başqa bir evdə saxlanılıb. O, saat 15:30-da tutulub və istintaq orqanına aparılıb.

Azərbaycan Baş Prokurorluğu isə daha əvvəl bildirib ki, Nəsimi Musayev sentyabrın 26-da Laçın istiqamətində hərbi hissəni tərk etdikdən sonra itkin düşüb və onunla bağlı axtarış tədbirləri aparılıb. Azərbaycan tərəfi onun Ermənistanda saxlanıldığını müəyyən etdikdən sonra Ermənistan hakimiyyəti ilə əlaqə saxlanıldığını açıqlayıb.

Gülnar Nazimqızı