Ermənistanda qanun layihəsi üstündə deputatlar əlbəyaxa olub - video

Ermənistan Milli Məclisində hakim “Vətəndaş Müqaviləsi” və müxalifətdəki “Güclü Ermənistan” fraksiyalarının deputatları arasında mübahisə davaya çevrilib. Qarşıdurma parlamentin gündəliyinə Ermənistan Apostol Müqəddəs Kilsəsindəki vəziyyətlə bağlı istintaq komissiyasının üzvlərinin sayının müəyyənləşdirilməsi məsələsinin daxil edildiyi iclasda baş verib.

Mübahisə “Güclü Ermənistan” fraksiyasının deputatı Edqar Qazaryanın çıxışı zamanı başlayıb. Qazaryan parlamentdə dövlət vəsaitlərinin xərclənməsi ilə bağlı tənqidi fikirlər səsləndirib və deputatlara bonus kimi verilən 250 min dramı xərcləməməyə çağırıb.

Milli Məclisin spikeri Ruben Rubinyan Qazaryanın gündəlikdəki məsələyə uyğun çıxış etmədiyini bildirərək onun mikrofonunu söndürüb.

Bundan sonra hakim və müxalifət deputatları arasında qarşıdurma yaranıb. Deputatların bir-birini itələdiyi və dartdığı bildirilib.

Rubinyan iclasda fasilə elan edib və təhlükəsizlik əməkdaşlarını zala çağırıb. Təhlükəsizlik əməkdaşları qarşıdurmaya müdaxilə edərək deputatları zaldan çıxarmağa çalışıblar.

Oktyabrın 6-da başlayan parlament iclaslarının gündəliyində iki məsələ yer alıb. Onlardan biri Ermənistan Apostol Müqəddəs Kilsəsində bir sıra ruhanilərin fəaliyyəti nəticəsində yaranmış böhranı və kilsənin erməni xalqının mənəvi həyatında, milli mədəniyyətin inkişafında və milli kimliyin qorunmasında missiyasının yerinə yetirilməməsi ilə bağlı problemləri araşdıracaq istintaq komissiyasının üzvlərinin sayının müəyyənləşdirilməsi barədə layihədir.

Müxalifət fraksiyaları bu təşəbbüsü konstitusiyaya zidd hesab edir və komissiyanın işində iştirak etməyəcəklərini bildiriblər.

Gülnar Nazimqızı