Ukrayna 77 əsir mübadiləsi çərçivəsində 9 726 şəxsi geri qaytarıb

Ukrayna 77 əsir mübadiləsi çərçivəsində 9 726 nəfəri ölkəyə qaytarıb. Bunu Ukrayna Parlamentinin İnsan Hüquqları üzrə Komissarı Dmitro Lubinets bildirib.

Onun sözlərinə görə, geri qaytarılanların 8 823-ü hərbi qulluqçu, 903-ü isə mülki şəxsdir. Qaytarılanlar arasında əvvəllər döyüşlər zamanı itkin düşmüş hesab edilən şəxslər də var.

Lubinets bildirib ki, Ukraynanın dövlət qurumları və beynəlxalq tərəfdaşların birgə səyləri nəticəsində həyata keçirilən mübadilələr Cenevrə konvensiyalarına uyğun olaraq hərbi əsirlərin qaytarılmasına imkan verir.

“Ölkəmizi müdafiə edən hər bir hərbi qulluqçunun taleyinin müəyyənləşdirilməsi Ukrayna üçün son dərəcə vacibdir”, - Lubinets deyib.

O, mülki şəxslərin geri qaytarılmasını ən çətin məsələlərdən biri adlandırıb və hazırda onların mübadiləsi üçün işlək mexanizmin olmadığını bildirib.

Aytac Zeynalova