İstanbulda güclü yağış və fırtına nəticəsində iki nəfər ölüb

Türkiyənin İstanbul şəhərində güclü yağış və fırtına nəticəsində iki nəfər ölüb, yüzlərlə ev və iş yerini su basıb. Şəhərdə 41 ilin ən yüksək yağıntı göstəricilərindən biri qeydə alınıb. Bu barədə Türkiyə mediası məlumat yayıb.

Oktyabrın 14-də Fatih rayonunda su yığılmış ərazidə elektrik cərəyanının vurduğu 14 yaşlı uşaq, Sarıyer rayonunda isə sel sularından keçərkən yıxılan 34 yaşlı şəxs həyatını itirib. Hər iki hadisə ilə bağlı araşdırma başlanılıb.

İstanbul Böyükşəhər Bələdiyyəsinin məlumatına əsasən, Beykoz rayonunda hər kvadratmetrə 242 kiloqram yağıntı düşüb. Eyüpsultanda bu göstərici 190,5 kiloqram, Sarıyerdə isə 187,9 kiloqram olub.

İstanbul Valiliyi bildirib ki, saat 06:00-dan 20:00-dək Fövqəladə Halların İdarə Olunması Agentliyinin (AFAD) İstanbul üzrə bölməsinə və 112 təcili çağrı mərkəzinə ümumilikdə 2 518 müraciət daxil olub. Müraciətlərin 1 277-si su basması, 15-i torpaq sürüşməsi, 47-si insanların köməksiz vəziyyətdə qalması ilə bağlı olub.

Sarıyer rayonunun Ayazağa məhəlləsində su basmış iş yerlərində köməksiz vəziyyətdə qalan təxminən 200 nəfər xilasedicilər tərəfindən təxliyə edilib. Şəhərin müxtəlif ərazilərində avtomobillər sel sularına qərq olub, metro stansiyalarını, yeraltı keçidləri, yaşayış evlərini və iş yerlərini su basıb.

Əlverişsiz hava şəraiti səbəbindən İstanbulda oktyabrın 15-də məktəblərdə tədris dayandırılıb. Həmçinin 43 təyyarə başqa hava limanlarına yönləndirilib.

Aytac Zeynalova