Trampın keçmiş müşaviri Zelenskini istefaya çağırıb

ABŞ Prezidenti Donald Trampın milli təhlükəsizlik məsələləri üzrə keçmiş müşaviri Maykl Flin Ukraynada müharibənin başa çatması üçün Prezident Volodimir Zelenskinin dərhal istefa verməli olduğunu bildirib.Bu barədə Flin “Substack” platformasında dərc olunan məqaləsində yazıb.

O, Ukrayna rəhbərliyini xalqın iradəsinə qulaq asmağa, ABŞ və Avropa İttifaqını isə Zelenskiyə dərhal seçkilərin keçirilməsi üçün təzyiq göstərməyə çağırıb.

“Zelenski Ukraynanı gələcəyə aparmağa qadir lider deyil. Onun hakimiyyətdə qalması yüz minlərlə, hətta milyonlarla insanın həyatına son qoymuş müharibənin daha da uzanması riski yaradır”, – Flin vurğulayıb.

Keçmiş müşavirin fikrincə, Ukraynanın yeni prezidenti Rusiya ilə fərqli dialoq qura, müvəqqəti atəşkəs müzakirələrindən daimi sülhün əldə olunmasına keçə bilər.

O, Ukrayna cəmiyyətinin tükəndiyini və ölkənin daha ağıllı, təmkinli, strateji baxımdan səriştəli liderə ehtiyacının artdığını qeyd edib.

Qeyd edək ki, bundan əvvəl “Fox News” telekanalına müsahibəsində Zelenski Ukraynanın cəbhə xətti boyunca münaqişənin dondurulmasına razı olduğunu bildirib.

“İndi bizə məhz münaqişənin dondurulması lazımdır və bu, müharibəyə son qoymağın real yoludur”, – Ukrayna Prezidenti deyib.