Xalq artisti, bu gün dünyasını dəyişmiş Amaliya Pənahovanın Milli.Az-a müsahibəsini təqdim edirik. Bu, böyük sənətçinin son müsahibəsi idi...
- Amaliya xanım, istər teatr səhnəmizdə, istərsə də filmlərimizdə bir çox qadın obrazları yaratmısınız. Sizin üçün qadın xoşbəxtliyi nədir?
- Qadını gərək anlasınlar, başa düşsünlər. O ən böyük xoşbəxtlikdir ki, səni başa düşürlər.
- Sizin özünüzü tez-tez başa düşürlər?
- Xeyr, görünür mən sadə insan deyiləm ki, məni hamı başa düşə bilmir.
- Həyatda və sənətdə uğur qazanmağın sirri nədir?
- Həyatda öz lazımlılığını hiss etmək. Həmçinin sən hiss edirsən ki, səhnəyə, sənətə lazımsan. Bunu hiss etmək lazımdır. Hiss edəndə uğur da qazanacaqsan.
- Bu doğru fikirdir ki, gərək qadının arxasında kişi dayansın və ona dəstək olsun?
- Xeyr! O qədər kişilər var ki, arxalarında qadınlar dayanıb. İnsanlar müxtəlifdir. Həyatda tək insanlar var ki, çox nailiyyət qazanıb. Nəyisə nəyəsə qurban vermək o deməkdir ki, ya insan zəifdir, ya da bacarıqsız.
- Amaliya Pənahova üçün ailə nə deməkdir?
- Ailə mənim üçün çox şeydir.
- Nələri qurban vermisiz bunun üçün?
- Heç nəyi! Yalan sözdür ki, sənət qurban tələb edir. Ola bilər ki, öz dincliyimdən, asudə vaxtımdan keçmişəm. O da ailəyə bağlılıqdan olub.
- Sənətdə vəfasızlıq görmüsüz?
- Mən çox vəfasız məqamlarla rastlaşmışam. İnsan getdikcə daha da bərkiyir. Bu nəticəyə gəlmişəm ki, insana özündən başqa heç kim sirdaş ola bilməz.
- Nəyi bağışlaya bilməzsiniz?
- Xəyanəti, satqınlığı, etibarsızlığı heç vaxt bağışlamıram. Mən o adamlardan uzaqlaşıram.
- İnsanın böyüklüyü nədədir?
- Yaxşılığı bacarmaqda. Hər kəs yaxşılıq etməyi bacarmır. Əgər onu hansısa məqsədlə edirsə demək ki, o yaxşılıq deyil.
- Həyatınızdakı hansı günü heç vaxt unutmursunuz?
- Mən ürəkdən şaqqanaq çəkib gülməkdən həmişə çəkinmişəm. Yalan deyərəm ki, sevincli anlarım çox olub. 2-3 olub, onları da çalışmışam ki, ürəyimdə saxlayım.
- Güclü xanımsınız. Heç vaxt sizi efirdə ağlayan, kövrələn görməmişik...
- Mənim göz yaşımı niyə tamaşaçı görməlidir ki? Mən sevmirəm ki, kiminsə mənə yazığı gəlsin.
www.anews.az
Bizi sosial şəbəkələrdə izləyin !
