Yaponiyada yaşı 100-dən çox olanların sayı artıb

100 yaşdan yuxarı yaponiyalıların sayı ilk dəfə olaraq 92 mini keçib. Bu barədə məlumatı Yaponiyanın Səhiyyə, Əmək və Rifah Nazirliyi 18 sentyabrda qeyd olunan Ahıllara təşəkkür günü münasibəti ilə yayıb. 


Sentyabrın 15-nə ölkədə yaşı 100-dən yuxarı olan vətəndaşların sayı 92 139 nəfər olub. Yüzilliklərin sayı 50 ildən artıqdır ki, ardıcıl olaraq artır və hər il yeni rekord müəyyənləşdirir. Bu il ölkədə yaşı 100-dən yuxarı olanların sayı 1500 nəfər artıb. Əsrin yaşı olanların təxminən 89 faizini qadınlar təşkil edir.

İdarədən bildirilib ki, bu il 47 107 nəfər 100 illik yubileyini qeyd edir, onlara təbrik məktubları və xatirə hədiyyələri göndəriləcək.

Yaponiyada yaşlı insanların sayı ən azı 1963-cü ildən, Yaşlıların Rifahı Qanunu qəbul edildikdən sonra durmadan artır. Həmin dövrdə ölkədə yaşı 100-dən yuxarı 153 nəfər yaşayırdı. 1981-ci ildə onların sayı 1000-i, 1998-ci ildə 10 mini, 2012-ci ildə isə artıq 50 mini keçib.


Yaponiya uzunömürlülük üzrə dünya liderlərindən biridir. Hər 100.000 əhaliyə 100 yaşdan yuxarı 73 nəfər düşür. Digər ölkələrdə olduğu kimi Yaponiyada da qadınlar kişilərdən daha uzun yaşayırlar. Qadınlar üçün orta ömür uzunluğu 87, kişilər üçün isə 81 yaşdan çoxdur.



www.anews.az