Yasamal rayonunda ağac soyqırımı - FOTO
14.03.2014 13:57
Bu gün Yasamal rayonu, N.Tusi adına klinikasının yaxınlığındakı ağacların kütləvi şəkildə qırılması və sakinlərin etirazı ilə bağlı redaksiyamıza məlumat daxil olub.ANN.Az-ın əməkdaşı baş verənləri araşdırmaq üçün hadisə yerinə gedib. Saytın əməkdaşı əraziyə çatarkən artıq ağacların kəsildiyini və Yasamal rayon Mənzil Kommunal Təsərrüfat Birliyinin işçilərinin ərazidə təmizlik işləri apardığını görüb. Hadisə yerində Post Patrul Xidməti əməkdaşları və 90 BA 710 nömrə nişanlı maşınla gəlmiş mülki geyimlilər olub.Hadisənin şahidlərindən biri olan və adının çəkilməsini istəməyən taksi sürücüsünün sözlərinə görə, ərazidə 50-yə yaxın ağac olub və onların 42-si kəsilib: “Gecə saat 4 radələrində ağacların hamısını kəsdilər. Səhər iki mülki geyimli gəldi. Hiss olunurdu ki, ərazini alan adamlar idilər. Hətta gülərək “Bu ağacları xoxan aparıb ki” deyərək ərazidə bir az gəzdilər, sonra burada çalışanlara tapşırıqlar verib getdilər. Bir az sonra əraziyə sakinlər toplaşdı və etirazlarını bildirdilər. Rayon İcra Hakimiyyətinin müavini və polis hadisədən xəbərsizmiş kimi məsələni araşdıracaqlarını dedilər”.Qeyd edək ki, ərazidə təmizlik işləri aparan Yasamal rayon MKTB işçiləri jurnalistlərə açıqlama verməkdən imtina ediblər: “Biz icra hakimiyyətinin işçisiyik, təmizlə deyiblər, təmizləyirik. Xahiş edirik, çörəyimizə bais olmayın”.Məsələ ilə əlaqədar Yasamal rayon İcra Hakimiyyətindən münasibət öyrənmək istəsək də, telefon zənglərimiz cavabsız qaldı. Yaxın saatlarda icra hakimiyyətinin də mövqeyini işıqlandırmağa çalışacayıq.Kökündən çıxarılmış ağacların bir çoxu ərazidən aparılsa da, ayrı-ayrı hissələr hələ təmizlənməkdə idi. ANN.Az-ın əməkdaşının çəkdiyi fotoları oxuculara təqdim edirik:SeymurANN.Az
Foto 
Video 
