Yeni avtobuslar gəlir

"Şəhərdəki qəsəbələr getdikcə genişlənir, avtobuslara tələbat çoxalır. Buna görə də həmin avtobusların marşrut dislokasiyasının dəyişdirilərək daha da genişləndirilməsi gözlənilir. Belə ki, həmin avtobusların marşrutunun 1-2 km daha uzadılması haqqında düşünülür".

ANN.Az ANS PRESS-ə istinadən xəbər verir ki, bunu açıqlamasında Nəqliyyat Nazirliyinin Dövlət Avtomobil Nəqliyyat İdarəsinin Bakı Regional Şöbəsinin rəis müavini Əmrah Cəfərov deyib. Onun sözlərinə görə, ölkəyə gətirilən yeni avtobuslar şəhərdaxili marşrutlar üzrə hərəkət edəcək. "Köhnə avtobuslar isə şəhərətrafı marşrutlar üzrə işləyəcək".

O həmçinin bildirib ki, ilin sonunadək 300 avtobusun gətirilməsi nəzərdə tutulub. "Bunların 50-si artıq gəlib, qalan 250 avtobus isə ilin sonunadək gətiriləcək".

"Bu yaxınlarda Bakıya gətirilən 50 ədəd avtobus 61 və 65 saylı marşrutlar arasında paylanıb. Onların hər birinə 25 avtobus verilib. Həmin avtobusların hər cür rahatlığı var. İçərisində video kameralar quraşdırılıb, əlillər üçün yerlər nəzərdə tutulub, bundan başqa, onların tutumu da böyükdür. Sürücü ilə sərnişin arasında münaqişə yaranarsa və ya oğurluq, cibgirlik olarsa, belə halları araşdırmaq üçün müşahidə kameralarından istifadə etmək olar", - deyə Əmrah Cəfərov əlavə edib.

ANN.Az