Birləşmiş Ştatlar administrasiyası hesab edir ki, Ankara Suriyadakı vəziyyətin həlli üçün öz təsir gücündən istifadə etməlidir. Bu barədə Dövlət Departamentinin mətbuat xidmətinin rəhbəri Metyu Miller məlumat verib.
Ondan Vaşinqtonun Suriya münaqişəsinin həlli üçün hansı təsir mexanizmlərinə malik olduğu soruşulub. "Dünən dövlət katibi Türkiyənin xarici işlər naziri Hakan Fidanla danışıb," - Miller deyib.
Miller söhbətin detallarını açıqlamaqdan imtina edib.
"Biz bölgə ölkələrinin nümayəndələri ilə apardığımız bütün danışıqlarda hər bir ölkəni öz təsir gücündən istifadə etməyə, eskalasiyanın qarşısını almağa və deeskalasiya üçün səy göstərməyə çağırmağa davam edirik. Biz istəmirik ki, hər hansı bir ölkə Suriyadakı vəziyyətdən istifadə edərək öz maraqlarını güdsün və Suriyanın qeyri-sabitliyindən faydalansın. Biz istəyirik ki, bütün ölkələr təsir vasitələrini tətbiq edərək eskalasiyanın dayandırılmasına, mülki əhalinin müdafiəsinə və sonda siyasi prosesin irəliləməsinə kömək etsinlər," - Miller deyib.
Diplomat əlavə edib ki, ABŞ-ın Suriya prezidenti Bəşər Əsədə qarşı siyasəti dəyişməyib.
Bununla yanaşı, o, Vaşinqtonun daha əvvəl dəfələrlə bəyan etdiyi kimi, Əsədin istefa verməsini istəməsi məsələsinə aydınlıq gətirməkdən imtina edib.
Miller ABŞ-ın Suriyadakı hadisələrə müdaxiləsi ilə bağlı yayılan şayiələri yalan adlandırıb.
"Biz, əlbəttə ki, bu təşkilatı heç bir formada dəstəkləmirik. Sosial mediada yayılan müxtəlif şayiələri bilirəm, lakin bəzi hallarda etibarlı hesab olunan şəxslər iddia ediblər ki, biz bu hücumun arxasında dayanırıq. Bu, hər bir baxımdan, formada və ifadədə tamamilə yalandır," - Miller vurğulayıb.
N.Təbrizli
www.anews.az
Bizi sosial şəbəkələrdə izləyin !
