"Əgər bir həftə ərzində beynəlxalq müdaxilə ilə "Artsaxda" vəziyyət az-çox stabil kursa qayıtmasa, bundan sonra biz həm "Artsaxda", həm də ondan kənarda daha sərt hərəkətlərə keçəcəyik", - Arutyunyan bildirib. 

 

Milli Məclisin deputatı Bəhruz Məhhərrəmov deyir ki, Prezident İlham Əliyevin hücum siyasəti nəticəsində Ermənistanın manipulyasiya imkanları azaldıqca separatçılar artıq onlar üçün sonun çatdığının fərqindədir.

 

"Ermənistanın hələ də Qarabağda qalmış 10 minlik ordu qalıqları, o cümlədən qanunsuz silahlı dəstələr, habelə,  Ermənistandan və havadarlarından mümkün dəstək belə separatçılara Azərbaycanla açıq münaqişədə fiaskodan başqa heç nə vəd edə bilməz. Bu mənada separatçılar mövcud durumda çıxış yolunu yenidən himayəçilərinə - Rusiya sülhməramlılarına sığınmaqda, habelə Rusiyanın "adamlarına” "siyasi səhnədə” daha geniş yer verməkdə görürlər. Separatçı rejimin "dövlət naziri" Qurgen Nersesyanın son proseslərdə daha qabarıq formada rol almasına da bu prizmadan baxmaq lazımdır. Digər tərəfdən, sülhməramlıların özlərinin də regiona gəldikləri gündən separatçıların hüquqazidd davranışlarına rəvac verməsi, 10 noyabr Bəyanatının 4-cü maddəsinə zidd olaraq sülhməramlıların müvəqqəti nəzarət zonasında həm Ermənistan silahlı qüvvələrinin 10 mindən artıq heyəti, həm də separatçıların qanunsuz hərbi birləşmələrinin mövcudluğuna göz yumması artıq kontingentin qərəzli tərəfə çevrildiyini göstərir", - deputat söyləyib.

 

Deputat hesab edir ki, separatçılar da vəziyyətin fərqindədir, situasiyadan ruhlanaraq Azərbaycan ərazisində müvəqqəti - 5 il müddətinə yerləşdirilmiş sülhməramlıların qərargahına istinad nöqtəsi kimi baxaraq Azərbaycan əleyhinə mitinqlərini məhz orada təşkil edirlər.

 

 

İyulun 14-də Xankəndidəki erməni vətəndaşlar Azərbaycana qarşı aksiyaya başlayıblar. 

 

İyulun 11-də Azərbaycan Dövlət Sərhəd Xidməti (DSX)  Beynəlxalq Qızıl Xaç Komitəsinin (BQXK) avtomobillərində qaçaqmalçılıq faktlarının aşkarlanmasına görə Laçın sərhəd-keçid məntəqəsini müvəqqəti olaraq dayandırıb. 

 

Bildirilib ki, iyulun 1-5 arasında BQXK-nın avtomobilləri tərəfindən bəyan edilməmiş mobil telefonlar,siqaret və benzin qaçaqmalçılıq yolu ilə keçirməyə cəhd olunub. 
 
Açıqlamada qeyd olunub ki, qanunsuz keçirmələrlə bağlı BQXK-nın rəsmi kanalları vasitəsilə xəbərdarlıq edilməsinə baxmayaraq heç bir tədbir görülməyib. 
 
Baş verən hadisə ilə bağlı Cinayət Məcəlləsinin müvafiq maddələri ilə cinayət işi açılıb və zəəruri tədbirlər görülməsi açıqlanıb və qeyd olunub ki, Laçın buraxılış məntəqəsindən keçid müvvəqəti olaraq dayandırılıb. 
 
2023-cü ilin aprelin 23-də Azərbaycan Dövlət Sərhəd Xidməti Ermənistanla sərhəddə, Laçın-Xankəndi yolunun başlanğıcında sərhəd-keçid məntəqəsinin quraşdırılmasını elan edib.
 
İyunun 15-də Ermənistan silahlı qüvvələri Laçın dəhlizində Azərbaycan sərhəd-buraxılış məntəqəsini atəşə tutub. Nəticədə Dövlət Sərhəd Xidmətinin (DSX) hərbçisi yaralanıb. Azərbaycan Xarici İşlər Nazirliyi baş verən hadisəni pisləyib və "beynəlxalq ictimaiyyəti Ermənistan tərəfinin bu təxribatını qətiyyətlə pisləməyə və Ermənistanı bölgədə sülh və sabitliyə hədə olan təcavüzkar hərəkətlərdən çəkinməyə" çağırıb. 
 
Baş verən insidentdən sonra Laçın sərhəd-keçid məntəqəsində avtomobillərin keçidi müvəqqəti olaraq dayandırılmışdı.