Rusiyapərəst qüvvələrlə mövqe döyüşlərinin getdiyi Ukraynanın şərqində azərbaycanlıların həyatı təhlükədədir. Onların bəzisindən iki aya yaxındır ki, xəbər yox idi.ANN.Az xəbər verir ki, ANS TV-nin məlumatına görə, Ukraynanın Luqansk şəhərində Rusiyapərsət qüvvələrin girov götürdüyü həmyerlimiz 2 min dollar müqabilində azad olunduqdan sonra başına gələnləri ANS-ə danışıb. Təhlükəsizlik baxımından tanınmasını istəməyən müsahibimiz, girovluqda olduğu vaxt işgəncələrə məruz qaldığını dedi:“Biz şəhərdə gəzişirdik. Bu vaxt əlisilahlı hərbi formada 5-6 nəfər bizə yaxınlaşaraq tutub qaldıqları yerə apardılar. Bundan sonra onlar bizə suallar verməyə başladılar. Luqanskda yaşayırsınız, nə üçün bizlərə qoşulub vuruşmursunuz? Biraz onlarla sözümüz çəp gəldi. Bizi vurmağa başladılar. Vurduqdan sonra bizi qaldıqları yerin zirzəmisinə saldılar. Zirzəmidə bizdən başqa çoxlu sayda adamlar var idi. Onlar bu insanlarla vəhşicəsinə rəftar edirdilər. Onları gah döyür, gah əllərini, gah da qolların kəsirdilər”.Luqansk şəhərində Azərbaycan cəmiyyətinin sədri Rasim Uğurluyev isə oğlunun guya Ukrayna ordusuna kömək etməkdə ittiham edilərək girov götürüldüyünü deyir. 5 min dollar müqabilində oğlunu girovluqdan azad etdiyini deyən Rasim Uğurluyev Ukraynanın şərqində azərbaycanlılara qarşi ciddi təhlükə yarandığını və silahlıların digər azərbaycanlıları da girov götürdüyünü deyir.Rasim Uğurluyev azərbaycanlılara aid avtomobillərin əllərindən alındığı, evlərinə girilərək pul alındığını deyir. O, Ukraynanın şərqindəki digər şəhərlərdə də azərbaycanlılara qarşı belə halların baş verdiyini deyir.Məsələ ilə bağlı Azərbaycanın Ukraynadakı səfirliyində araşdırma aparılır. Girov götürülən azərbaycanlıların yaşadıqları Dmitri kəndi hazırda əməliyyatların getdiyi yerdir. Orada Ukrayna Milli Qvardiyasının döyüşçüləri ilə Rusiyapərəst qüvvələr arasında döyüşlər gedir.ANN.Az