Bakıda qeyri-adi oğurluq - Video

Paytaxtın Nizami rayonu, Bəhruz Nuriyev küçəsində yerləşən çoxmərtəbəli binaların dəhlizlərindən yanğınsöndürən borular naməlum şəxs tərəfindən oğurlanıb. Hadisə binadakı mənzillərdən birinə aid müşahidə kameraları vasitəsilə qeydə alınıb.

Daxili İşlər Nazirliyindən verilən məlumata görə, binaların dəhlizindən 15 ədəd yanğınsöndürən borunun oğurlanması ilə bağlı polisə məlumat daxil olub.

Nizami Rayon Polis İdarəsinin 24-cü Polis Şöbəsinin əməkdaşlarının keçirdiyi əməliyyat zamanı hadisəni törətməkdə şübhəli bilinən 28 yaşlı şəxs saxlanılıb. Şəxsin üzərinə baxış zamanı şəxsi istifadəsi üçün əldə etdiyi psixotrop maddə - metamfetamin də aşkar edilərək götürülüb.

Faktla bağlı araşdırmalar davam etdirilir.