"Azəriqaz" nə deməkdir, bunu kim uydurub? - Deputatdan irad

“Azəriqaz” ifadəsinin seçilməsi anlaşılmazdır. Bunu Milli Məclisin deputatı Səyyad Aran deyib. 

Deputat bildirib ki, Azərbaycan dilinə münasibət narahatlıq doğurur və bəzi qurum adları izaha ehtiyac yaradır.

Onun sözlərinə görə, “Azərişıq”, “Azərxalça”, “Azərkosmos” kimi adlandırmalar fonunda “Azəriqaz” ifadəsinin seçilməsi anlaşılmazdır.

“‘Azəriqaz’ nə deməkdir, bunu kim uydurub? ‘Azəri’ nədir? Bu ad hansı məntiqlə seçilib. Sən bunu hansı ağılla Azəriqaz adlandırmısan. Hansı ağıllı bu sözü tapıb. Xahiş edirəm buna bir açıqlama verilsin. Bu nə Azəribazlıqdır?”, - deputat bildirib. 

Deputat bu ifadəni “farsa aid termin” kimi qiymətləndirərək, məsələ ilə bağlı rəsmi açıqlama verilməsini istəyib.

Səyyad Arаn qeyd edib ki, “azəri” anlayışı İran kontekstində daha çox tayfa və ya etnik azlıq adı kimi işlədilir və bu terminlərin Azərbaycanda dövlət qurumlarının adlarında istifadəsi dil və kimlik baxımından mübahisəlidir.

Deputatın fikrincə, bu cür adlandırmalar Azərbaycan dilinə və milli kimliyə münasibətin yenidən nəzərdən keçirilməsini zəruri edir.

Gülnar Nazimqızı