"Facebook”-da fəaliyyət göstərən "Modern Doctors of Azerbaijan" qrupunda bir neçə gün öncə döyülən, daha sonra isə xəstəxanada dünyasını dəyişən jurnalist Rasim Əliyev mövzusu müzakirə olunub. Təəssüf ki, qrup üzvlərinin əksəriyyəti həkim olan istifadəçilər Rasim Əliyevi əməliyyat edən və işinə səhlənkarcasına yanaşan həkimi müdafiə edib, eyni zamanda Azərbaycan jurnalistləri haqqında da xoşagəlməz ifadələr işlədiblər. 

Həkim Kamil Quluzadə jurnalistləri təhqir edərək onları "şərəfsiz" adlandırıb. Digər həkim həmkarı ona haqq qazandıraraq jurnalistlərə "zurnalist” deyə müraciət edib. Eyni zamanda "Natavan Ramazanzade” profilinin sahibi – "Xəstəxanada xəstə ölər də” deyərək faciəni aşağılamağa çalışıb.

Jurnalist araşdırmasına görə, qələm adamlarını təhqir edənlər, Rasim Əliyevin ölümünə haqq qazandıran həkimlər - Natavan Ramazanzadə Azərbaycanda Tibb Universitetini, Türkiyədə isə Çukurova Univerisetitində təhsil alıb və hazırda baş-boyun cərrahı kimi fəaliyyət göstərir, Nurlan İbrahimli də Azərbaycan Tibb Universitetində təhsil alıb, Kamil Quluzadə isə Quba Müalicə Diaqnostika Mərkəzində həkim - cərrah olaraq fəaliyyət göstərir.

ANN.Az əməkdaşı həkimlərin sosial şəbəkədə jurnalsitlərə qarşı bu cür təhqir edici ifadələr işlətməsilə ilə əlaqədar Səhiyyə Nazirliyi mətbuat xidməti ilə əlaqə saxlasa da zənglərə cavab verən olmadı. 

Nə üçün bəzi həkimlər öz həmkarlarının səhlankarlığı ucbatından vəfat edən gəncin ölümünə belə laqeyid yanaşır, üstəlik, bu hadisəni ictimailəşdirməyə borclu olan jurnalistləri təhqir edir, səhlənkar həmkarlarının müdafiəsinə qalxırlar? 

 

 

Məsələyə münasibət bildirən "Turan” İnformasiya Agentliyinin baş direktoru Mehman Əliyev qeyd edib ki, ilk növbədə həkimlər yaralı vəziyyətdə xəstəxanaya çatdırılan Rasim Əliyevlə bağlı hansı tədbirlərin  görüldüyünü sənədlərlə, sübutlarla ictimaiyyətə hesabat verməlidirlər: "Hesab edirəm ki, Rasim Əliyev xəstəxanada adi palatada yatmalı deyildi, onun ciddi müayinəsi keçirilməli idi. Bütün bunlarla bağlı bütün ictimaiyyətə rəsmi açıqlamalar verilməlidir. Daha hansısa qeyri-peşəkar sosial şəbəkədə bu cür ifadələr işlətməməlidir. Deyə bilmərəm ki, bu barədə Səhiyyə Nazirliyi hansısa tədbir görməlidir, ya yox. Onlar özləri bu barədə qərar verməlidir”.

 

 

Məsələyə münasibət bildirən Lent.az saytının baş direktoru Qabil Abbasoğlu ANN.Az-a açıqlamasında bildirib ki, jurnalistləri, ümumiyyətli kiməsni təhqir etmək düzgün deyil:  "Bu haqda yalnız onu deyə bilərəm ki, jurnalistləri bu cür ifadələrlə təhqir etmək olmaz. Hər bir məsələyə hər kəs münasibət bildirir və həmin məsələ barəsində kimsə tənqid oluna bilər,  təhqir yox. Baş vermiş hadisəyə gəlincə, mən də hesab edirəm ki, əgər həkimlər jurnalist Rasim Əliyevlə bağlı lazimi və yetəri tədbirlər görsəydilər, yəqin belə faciəni yaşamazdıq”.

 

 

"Qafqazinfo.az” internet qəzetinin baş redaktoru  Elbrus Erud məsələ ilə bağlı ANN.Az-a açıqlamasında bildirib ki, belə aşağı səviyyəli müzakirələrə, qarşılıqlı ittihamlara fikir vermək lazım deyil: "Azərbaycanda peşəkar, səviyyəli bütün varlığı ilə sənətinə bağlı olan həkimlər və eyni zamanda ciddi fəaliyyətlə məşğul, professional jurnalistlərimiz də var. Bununla yanaşı hər iki tərəfdən səviyyəsiz və peşəkar olmayanları mövcuddur. 5-6 peşəkar olmayan həkimin və ya jurnalistin "Facebook”da bir-birilərini təhqir etməsinin özü səviyyəsizlikdir”.

Baş redaktor qeyd edib ki, sosial şəbəkədə özünü apara bilməyənlərə görə heç bir tədbir görülə bilməz və heç lazım da deyil: "Facebook” şəbəkəsində bu cür bir-iki səviyyəsiz insanın özünü orda apara bilməməsinə görə Azərbaycan "Facebooku”u bağlamasalar yaxşıdır”.