Venesuelada baş verən zəlzələdə ölənlərin sayı 1400-ü ötüb

Venesuelada bu həftə baş verən iki güclü zəlzələ nəticəsində ölənlərin sayı 1 430 nəfərə çatıb, 3 238 nəfər yaralanıb və davam edən afterşoklar xilasetmə əməliyyatlarını çətinləşdirib.Bu barədə ABŞ-ın CNN telekanalı Venesuela Milli Assambleyasının sədri Xorxe Rodriqesə istinadən məlumat yayıb.

Rodriqes bildirib ki, xilasedicilər dağıntılar altında sağ qalanları tapmaq üçün axtarışları davam etdirirlər, lakin ağır texnika çatışmazlığı və təkrarlanan yeraltı təkanlar əməliyyatların sürətini azaldır.

Onun sözlərinə görə, 3 142 ailə evlərini itirib və müvəqqəti sığınacaqlara yerləşdirilib.

CNN-in məlumatına görə, uzun illər davam edən maliyyə və infrastruktur problemləri səbəbindən Venesuelanın səhiyyə sistemi çoxsaylı yaralılara yardım göstərməkdə çətinlik çəkir.

ABŞ Dövlət Departamenti isə zəlzələnin nəticələrinin aradan qaldırılmasına dəstək məqsədilə ölkəyə iki axtarış-xilasetmə qrupu göndərdiyini açıqlayıb.

"Bu gün hər biri 80 nəfərdən ibarət iki axtarış-xilasetmə qrupu Venesuelaya yola düşüb və ABŞ hökumətinin yardım səylərinə qoşulacaq", - məlumatda deyilir.