Bu gün təhsilin  keyfiyyətinin  aşağı səviyyədə olmasına gəlincə, təhsil mütəxəssisi bunu son 20 ildə müəllimlərin əmək haqqlarının çox aşağı olması ilə əlaqələndirib. O, maaşların sadəcə Dövlət İqtisadiyyat Universitetində deyil, həmçinin Bakı  Dövlət  Universitetində,   Azərbaycan   Dövlət Tibb Universitetində, Azərbaycan Dillər Universitetində  də artırıldığını  bildirib: "Elə ali təhsil müəssisələri var ki, orada ödənişli  təhsil haqları və  bütünlükdə  tələbə  sayı azdır. Ona görə  də həmin təhsil müəssisələri  məhdud  maliyyə  imkanları  səbəbi ilə  istədiyi qədər maaşları qaldıra bilmir.  Təbii ki, universitetlər arasında rəqabət var,   hər bir universitet çalışmalıdır ki, bazara uyğun qiymətlər müəyyən etsin. Burada  qiymət  və təhsilin  keyfiyyəti  müəyyən  nisbəti balans yaradır.  Məsələn,  Rusiyada   belə qərar qəbul edilib  ki, yaxın  zamanlarda  ali məktəb müəllimlərinin maaşı ölkə üzrə orta maaşdan iki dəfə yüksək olmalıdır. Bizdə  də  hazırda elə ali təhsil müəssisələri var ki, ölkə üzrə orta maaşdan  iki  dəfə yüksək maaş  verə bilir,  yəni orta aylıq maaş  ölkə  üzrə  400 manatdırsa,  universitet  800 manat  maaş verə bilir. Amma bəzi ali məktəblərinin bunu etməyə  gücü yetmir".

Ali təhsil müəsissələrinin reklamlarının xəbər portlarında yerləşdirilməsi məsələsinə münasibət bildirən mütəxəssis vurğulayıb: "Hazırda bazar iqtisadiyyatı hökm sürür. Universitetlər  qanun  daxilində  büdcələrinə  əlavə  maliyyə  vəsaitləri  qazana  bilərlər.  Dünyada bir çox universitetlər  fəaliyyət  xarakterinə    görə "Sahibkar  universitet”  adlanır. Bu  tip  universitetlər   elmi fəaliyyətindən, tədris fəaliyyətindən, innovativ fəaliyyətdən pul qazanırlar,  texnoparklar  yaradaraq innovativ  sahibkarlıqla  məşğuldurlar. Bu aspektdə  universitet  öz  reklam  fəaliyyətini  də  qura  bilər.  Bu  universitetin  marketinq  fəaliyyətinin  bir  elementi  sayılır".

 

Universitet  öz   strateji  fəaliyyət  istiqamətlərindən biri  kimi  təhsil  marketinqi  siyasətini  formalaşdırmalı olduğunu bildirən İ.Əhmədov bu  işdə  fəal  reklam  siyasəti  də  aparmağı mümkün sayır: "Reklam yolu ilə həmin müəsissələr özlərinə tələbə toplayıb qazanc əldə edirlər. Amma  dünya  təhsil  bazarında  elə  universitetlər  də  var ki, onların reklama ehtiyacı yoxdur. Çalışmalıyıq  ki, universitetylərimiz  belə  imic  qazansınlar,  xaricdən  çoxlu  tələbə  cəlb etsinlər, əlavə  maliyyə  qazansınlar.  Bundan ötrü  ilkin  olaraq  növbəti  5-10  il  ərzində  dövlət  mülkiyyət  tipindən asılı  olmayaraq  bütün ali təhsil  müəssisələrinə  güclü  investisiya  qoymalıdır, universitetlərin  indiki  büdcəsi  ilə  ali  təhsilimizin heç  bir  gələcəyi  ola  bilməz".

 

 

Orxan Aslanlı