Səhiyyə Nazirliyi şöbə müdiri vəzifəsinə müsahibə elan edildi
29.06.2020 19:00
Səhiyyə Nazirliyi daxili müsahibə elan edib.
Səhiyyə Nazirliyindən APA-ya bildirilib ki, müsahibə İctimai səhiyyə və sanitariya-epidemioloji nəzarəti şöbəsinin müdiri vəzifəsi üçündür.
Müsahibədə Azərbaycan Respublikasının Səhiyyə Nazirliyində inzibati vəzifədə qulluq keçən və müvafiq ixtisas dərəcəsinə malik olan dövlət qulluqçuları iştirak edə bilər.
Müsahibədə iştirak etmək üçün ərizələrin qəbulu 29 iyun 2020-ci il tarixdən 13 iyul 2020-ci il tarixdə saat 18:00-dək aparılacaq. Ərizələr şəxsən (bazar ertəsi – cümə günləri saat 09:30-dan 13:00-dək və 14:00-dan 18:00-dək), yaxud poçt vasitəsi ilə təqdim edilə bilər.
Müsahibə zamanı müsahibədə iştirak edən dövlət qulluqçusunun bilik səviyyəsi, peşə hazırlığı, ümumi dünyagörüşü, barəsində müsahibə elan edilən vəzifə üçün zəruri olan şəxsi keyfiyyətləri yoxlanılmaqla müvafiq vəzifəyə uyğunluğu müəyyən edilir. Müsahibədə ixtisas dərəcəsi, müvafiq vəzifənin tələblərinə uyğun olaraq təkrar hazırlıq keçirilməsi və ixtisasın artırılması da nəzərə alınır.
Müsahibədə barəsində müsahibə elan edilən vəzifənin təsnifatından ən çoxu iki təsnifat aşağı inzibati vəzifələrdə qulluq keçən dövlət qulluqçuları iştirak edə bilərlər.
Namizəd müəyyən edilmiş şərtlərə cavab vermədikdə, habelə onun tərəfindən təqdim edilmiş məlumat və sənədlərdə bilərəkdən yanlış məlumatlar verilməsi aşkar edildiyi halda, namizədin müsahibədə əldə etdiyi nəticələr etibarsız hesab edilir.
www.anews.az
Facebook
Bizi Facebookda izləyin
Foto
Video
