Bakıda məsciddə baş verən hücum nəticəsində bir nəfər qətlə yetirilib

Azərbaycan paytaxtı Bakının Suraxanı rayonunun Bülbülə qəsəbəsində yerləşən İmam Ümmət məscidində qətl hadisəsi baş verib. Bu barədə yerli media orqanları məlumat yayıb.

İyulun 26-na keçən gecə, saat 04:00 radələrində, 1990-cı il təvəllüdlü Nadir Səfərov məscidin namaz otağında yatarkən bıçaqlanaraq öldürülüb. Rəsmi məlumatlara əsasən, o, bədəninin müxtəlif nahiyələrinə yetirilmiş 32 bıçaq xəsarəti nəticəsində hadisə yerində həyatını itirib.

Hadisəni törətməkdə şübhəli bilinən 1996-cı il təvəllüdlü Elvin Məmmədov polis tərəfindən saxlanılıb. Onun Vətən müharibəsi iştirakçısı olduğu, psixoloji problemlərinin mövcudluğu və tərəflər arasında şəxsi mübahisənin baş verdiyi bildirilir.

Qətlə yetirilən Səfərovun yerli icma tərəfindən hörmətlə qarşılandığı və xeyriyyəçilik fəaliyyəti ilə tanındığı qeyd edilir.

Faktla bağlı Suraxanı Rayon Prokurorluğunda cinayət işi açılıb, istintaq davam etdirilir.