Formula-1 Qran Prisi öncəsi Bakıda bəzi yollar bağlanır

Bakı Şəhər Dövlət Yol Polisi İdarəsi 19 sentyabrda start götürəcək "2025 Formula-1 Azərbaycan Qran Prisi" ilə əlaqədar paytaxt yollarında hərəkətin məhdudlaşdırıldığını elan edib və sürücülərə alternativ marşrutlardan istifadə etməyi tövsiyə edib. Bu barədə İdarədən məlumat verilib.

Yarış müddətində xüsusilə şəhərin cənub girişində nəqliyyat sıxlığının və təhlükəsizlik risklərinin qarşısını almaq məqsədilə sürücülərə Bakı-Salyan yolunun 14-cü kilometrliyindən başlayaraq, Lökbatan dairəsi və üçüncü kənar dairəvi yol vasitəsilə "20 Yanvar" və Yeni Yasamal ərazisindən keçməklə mərkəzə daxil olmaları tövsiyə olunub.

Bayıl və 20-ci sahə sakinləri üçün isə Qurban Abbasov küçəsi üzərindən Teymur Elçin, Mehdi Hüseyn və Lermontov küçələri vasitəsilə mərkəzə çıxış alternativi təqdim edilib.

Polis İdarəsi həmçinin yarış günlərində fərdi nəqliyyat vasitələrindən minimal istifadəni tövsiyə edir və şəhər mərkəzinə yalnız ictimai nəqliyyatla hərəkət edilməsinin vacibliyini vurğulayır.

"2025 Formula-1 Azərbaycan Qran Prisi" şəhər mərkəzində yerləşən Bakı Şəhər Halqasında keçiriləcək və yarışla bağlı nəqliyyat məhdudiyyətləri mərhələli şəkildə tətbiq olunacaq.