Azərbaycan vətəndaşlarının İordaniyaya vizasız rejimi tətbiq edilib

Azərbaycan və İordaniya arasında ümumvətəndaş pasportlarına malik vətəndaşlar üçün qarşılıqlı viza tələbi ləğv edilib.Bu barədə Dövlət Miqrasiya Xidmətindən bildirilib.
Qərar vətəndaşların səyahət imkanlarının asanlaşdırılması, iki ölkə arasında əməkdaşlığın gücləndirilməsi və turizmin inkişafının təşviqi məqsədilə qəbul edilib.
Yeni qaydalara əsasən, hər iki ölkənin etibarlı ümumvətəndaş pasportlarına malik vətəndaşları digər ölkəyə vizasız daxil ola, ölkədən çıxa və tranzit keçə bilərlər. Onlar hər 180 gün ərzində 90 gündən çox olmamaq şərtilə digər ölkənin ərazisində qala bilərlər.
Dövlət Miqrasiya Xidməti bildirib ki, Azərbaycan ərazisində 15 gündən artıq müvəqqəti olan əcnəbilər Miqrasiya Məcəlləsinin tələblərinə uyğun olaraq olduğu yer üzrə qeydiyyata alınmalıdır.
Qanunvericilikdə nəzərdə tutulan əsaslar olduqda əcnəbilər müvəqqəti olma müddətinin uzadılması və ya müvəqqəti yaşama icazəsinin verilməsi üçün Dövlət Miqrasiya Xidmətinə müraciət edə bilərlər. Müraciət "ASAN xidmət" mərkəzlərindəki "miqrasiya xidmətləri" işçi pəncərələri vasitəsilə fiziki, həmçinin Xidmətin rəsmi internet səhifəsinin "Elektron xidmətlər" bölməsi vasitəsilə elektron qaydada təqdim edilə bilər.
























