Bu ilin yeddi ayında Azərbaycanda 762 yeni İİV yoluxması qeydə alınıb

2025-ci ilin ilk yeddi ayı ərzində aparılan müayinələr nəticəsində Azərbaycanda 762 nəfər İnsanın İmmunçatışmazlığı Virusuna (İİV) yoluxmuş şəxs aşkarlanaraq qeydiyyata alınıb. Bu barədə “Report”un sorğusuna cavab olaraq Səhiyyə Nazirliyinin Respublika QİÇS-lə Mübarizə Mərkəzindən məlumat verilib.

Onlardan 749 nəfəri Azərbaycan vətəndaşı, 13 nəfəri isə əcnəbidir. Yoluxanların 542-si kişi, 207-si qadındır.

Azərbaycan vətəndaşları arasında inyeksion narkotik istifadəsi ilə əlaqəli yoluxma halları 35 nəfər təşkil edib.

2024-cü ilin eyni dövrü ilə müqayisədə (799 nəfər) bu il yoluxma hallarının sayında cüzi azalma müşahidə olunur. Mütəxəssislər bu azalmanı vaxtında aparılan testlər və profilaktik tədbirlərlə izah edirlər.

Mərkəz İİV-in qarşısının alınmasında maarifləndirmə, riskli davranışlardan çəkinmə, mütəmadi testlərdən keçmək və ehtiyac olduqda həkim məsləhəti almağın vacibliyini vurğulayıb. Hazırda ölkə üzrə İİV testləri Səhiyyə Nazirliyinin Respublika QİÇS-lə Mübarizə Mərkəzində və regional laboratoriyalarda ödənişsiz, anonim və konfidensial şəkildə aparılır.