Süni intellekt enerji sərfini artırır — Firuddin Qurbanov

Süni intellektin (Sİ) geniş tətbiqi enerji istehlakının artması və ekoloji təsirlərin güclənməsi ilə bağlı yeni risklər yaradır. Bunu elm və təhsil nazirinin müavini Firuddin Qurbanov parlamentdə  Milli Məclisin Təbbi ehtiyatlar, energetika və ekologiya komitəsinin “İqlim dəyişikliyi ilə mübarizədə süni intellektin rolu” mövzusunda keçirilən elmi-praktik konfransda bildirib.

Qurbanov deyib ki, hazırda dünyada 8 milyona yaxın data mərkəzi fəaliyyət göstərir və onların hamısı “çox yüksək enerji sərfi ilə işləyir”, bu isə iqlim dəyişikliklərinə əlavə təzyiq yaradır.

Onun sözlərinə görə, bir kompüterin istehsalı üçün 2 kiloqram məhsula qarşı 800 kiloqram xammal istifadə olunması süni intellekt və rəqəmsal texnologiyaların gizli ekoloji yükünü göstərir.

Nazir müavini qeyd edib ki, Sİ-nin inkişafı üçün kadr hazırlığı həlledici məsələdir. Elm və Təhsil Nazirliyi hazırda 407 məktəbdə STEAM layihəsi həyata keçirir və burada süni intellekt mövzuları kurikulumlara inteqrasiya olunur. Qurbanov bildirib ki, məktəblilər bu mərkəzlərdə Sİ-yə dair innovativ layihələr təqdim edir, universitetlərdə isə geniş elmi tədqiqatlar aparılır.

O vurğulayıb ki, Sİ informasiya axınını sistemləşdirmək üçün böyük potensial yaratsa da, onun ekoloji nəticələrinin idarə olunması prioritet məsələ olaraq qalır.

Gülnar Nazimqızı