Süni intellekt və avtomatlaşdırma 2030-a qədər iş yerlərinin 22%-ni dəyişəcək - Nazir

Süni intellektin sürətli inkişafı, rəqəmsallaşmanın genişlənməsi və avtomatlaşdırma dalğası qlobal əmək bazarını köklü şəkildə yenidən formalaşdırır. Bunu əmək və əhalinin sosial müdafiəsi naziri Anar Əliyev "Gələcəyin Peşələr Sammiti"ndə deyib bildirib.

Nazirin sözlərinə görə, ənənəvi peşələrin məzmunu dəyişir, əmək resurslarına yönəlik tamamilə yeni bacarıq profilləri yaranır və dünya ölkələri sürətlə transformasiyaya uyğunlaşmağa məcbur olur.

Əliyev Dünya İqtisadi Forumunun “İşlərin Gələcəyi Hesabatı 2025”ə istinad edərək bildirib ki, 2030-cu ilə qədər mövcud iş yerlərinin 22%-i struktur dəyişikliyinə məruz qalacaq.

 Hesabata görə, avtomatlaşdırma və süni intellekt ən çox təkrarlanan əməliyyatlarla bağlı peşələri əvəz edəcək.

Nazir qeyd edib ki, qlobal rəqabət ölkələri daha çevik qərarlar qəbul etməyə vadar edir. Onun sözlərinə görə, regionlararası əməkdaşlığın gücləndirilməsi, beynəlxalq təcrübənin öyrənilməsi və qlobal əmək bazarına fasiləsiz inteqrasiya hazırkı şəraitdə xüsusi əhəmiyyət kəsb edir.

Gülnar Nazimqızı