Yaxın Şərqdə məhdudiyyətlər Azərbaycan üzərindən tranzit uçuşları 150-dən çox artırıb

Yaxın Şərqdə tətbiq olunan müvəqqəti hava məkanı məhdudiyyətləri nəticəsində bir sıra qlobal aviadaşıyıcılar marşrutlarını yenidən planlaşdıraraq Azərbaycan üzərindən uçuş tezliyini artırıb. Bu barədə  xəbər Report tərəfindən yayımlanıb.

Son bir neçə gün ərzində ölkə üzərindən 150-dən çox əlavə tranzit uçuş həyata keçirilib.

Hazırda Azərbaycanın hava məkanı 200-dən artıq beynəlxalq aviadaşıyıcı tərəfindən mütəmadi istifadə olunur. Onların təxminən 30-u uçuş marşrutlarını yenidən konfiqurasiya edərək Azərbaycan hava məkanına üstünlük verib; bu sırada Air France, British Airways, Lufthansa, Turkish Airlines və digər beynəlxalq aviadaşıyıcılar var.

Azəraeronaviqasiya Hava Hərəkəti İdarəsi (AZANS) beynəlxalq standartlara uyğun olaraq hava hərəkətinin təhlükəsiz və səmərəli təşkili, ATM texnologiyalarının tətbiqi və rəqəmsal transformasiya üzrə fəaliyyətini davam etdirir. Ölkə, Avropa–Asiya və Şimal–Cənub nəqliyyat axınlarının kəsişməsində regional və qitələrarası uçuşlar üçün etibarlı hava körpüsü funksiyasını yerinə yetirir.