FHN əhaliyə xəbərdarlıq edib

Azərbaycanın Fövqəladə Hallar Nazirliyi (FHN) havaların soyuması fonunda elektrik və qaz qızdırıcı cihazlarından istifadənin artdığını bildirərək əhaliyə yanğın təhlükəsizliyi ilə bağlı xəbərdarlıq edib.

Nazirlik məişətdə nasaz və qeyri-standart qızdırıcı cihazların işlədilməsi, elektrik şəbəkəsinin həddindən artıq yüklənməsi, eləcə də ehtiyatsızlıq və nəzarətsizliyin yanğın və partlayış riskini artırdığını qeyd edib.

FHN-in məlumatına görə, maarifləndirmə tədbirlərinə baxmayaraq, bəzi vətəndaşların təhlükəsizlik qaydalarına laqeyd münasibəti insan tələfatına, əmlak və infrastrukturda ciddi ziyana səbəb olur.

Qurum aşağıdakı qaydalara əməl olunmasını tövsiyə edib:

nasaz və standartlara uyğun olmayan elektrik və qaz cihazlarından istifadə edilməməli;

şəbəkələr yalnız mütəxəssis tərəfindən quraşdırılmalı və təmir olunmalı;

elektrik xətləri yüklənməməli;

şarj cihazları nəzarətsiz şəkildə qoşulu saxlanılmamalı;

mənzil daxilində tezalışan maddələr yığılmamalı;

evdən çıxarkən qızdırıcı cihazlar işlək vəziyyətdə qoyulmamalı;

qaz iyi hiss edildikdə qapı-pəncərələr açılmalı və dərhal mütəxəssis çağırılmalıdır.

Nazirlik yanğın baş verdikdə nəm parça ilə ağız-burunu qorumağı, əyilərək və ya sürünərək hərəkət etməyi, liftdən istifadə etməməyi və mümkün olmadıqda eyvanda xilasediciləri gözləməyi tövsiyə edib.

FHN vətəndaşlara xatırladıb: “Qaydalara biganəlik – həyat üçün təhlükəlidir.” Təhlükə zamanı 112-yə müraciət etmək tövsiyə olunur.